نگراں وزیراعلیٰ پنجاب محسن نقوی نے کہا ہے کہ عوامی افادیت کے پراجیکٹ مکمل کرکے جانا چاہتے ہیں۔

تفصیلات کے مطابق نگراں وزیراعلیٰ پنجاب محسن نقوی نے زیر تعمیر نئے راوی پل کے دورے کے بعد میڈیا سے گفتگو کرتے ہوئے کہا کہ سیاست میں آنے کا نہیں، واپس جانے کا ارادہ ہے، حرام کھانے پر لعنت بھیجتا ہوں اور جو کھاتے ہیں ان پر بھی لعنت بھیجتا ہوں،جو کھا چکے ہیں ان پر بھی لعنت بھیجتا ہوں، سی ایم آفس کا خرچہ خود اٹھارہا ہوں، بجلی کا بل ایک تہائی کم ہوچکا ہے، میں اور میرے وزراء اور مشیر تنخواہیں نہیں لیتے۔

محسن نقوی نے کہا کہ پنجاب میں ایک کروڑ سے زائد ڈرائیونگ لائسنس بن چکے ہیں، ایسا نہیں ہوسکتا کہ گاڑی یا موٹر سائیکل چلائیں لیکن لائسنس نہ ہو، ون وے کی خلاف ورزری پر کسی قسم کی نرمی نہیں برتی جائے گی، پہلے راولپنڈی، لاہور،فیصل آباد اور دیگر بڑوں شہروں میں صرف 100سے 200لائسنس بنتے تھے، اب لاہور میں روزانہ 30سے 40 ہزار لائسنس بن رہے ہیں، راولپنڈی اور گوجرانوالہ میں 8 ہزار تک لائسنس بن رہے ہیں، ڈرائیونگ لائسنس کی پابندی پر عملدر آمد کرانے کے حوصلہ افزا نتائج سامنے آئے،31 دسمبر تک لائسنس بنانے پر پرانی فیس لاگو رہے گی، یکم جنوری سے نئی فیس عائد ہوگی، اگر 31دسمبر تک لائسنس بنوا لیا جائے تو بچت ہوگی۔

انہوں نے کہا کہ پہلے منصوبوں میں تاخیر کی جاتی اور بلاضرورت التواء میں ڈال دیا جاتا تھا، منصوبے دو، دو تین، تین سال تاخیر کا شکار ہونے سے لاگت بڑھ جاتی ہے، امید ہے کہ بیشتر زیر تکمیل منصوبے 31جنوری تک مکمل ہوجائیں گے،2600کلو میٹر طویل 104 سڑکیں اور 100ہسپتالوں کی اپ گریڈیشن بھی مکمل کر لی جائے گی۔

ان کا کہنا تھا کہ ہر وزیر ایک ہسپتال کی مانیٹرنگ کررہا ہے اب سیکرٹریز کی بھی ڈیوٹی لگا رہے ہیں، روزانہ دو تین وزٹ کیے جاتے ہیں، گوجرانوالہ ایکسپریس وے اور دیگر بڑے پراجیکٹس مکمل کرنے کی پوری کوشش ہے، نئے راوی پل کے منصوبے پرتیزی سے کام جاری ہے،پائلنگ میں مشکلات کی وجہ سے تاخیر ہورہی تھی۔

محسن نقوی نے کہا کہ پائلنگ کے دوران نیچے سے دبے ہوئے کھجور کے درخت بھی نکلے ہیں، تکنیکی بنیادوں پر تاخیر کے باوجود راوی برج جلد تکمیل کے لئے کوشش کررہے ہیں، تکنیکی امور کے ساتھ ساتھ معیار اور مدت کو دونوں کو مدنظر رکھیں گے، راوی برج، شاہدرہ برج اور امامیہ کالونی برج تینوں پل بننے سے علاقے کی حالت بدل جائے گی، شاہدرہ اور امامیہ کالونی کو ماڈل ٹاؤن اور گلبرگ کی طرح پی ایچ اے خوبصورت بنائے گا۔

انہوں نے کہا کہ ہر برج کی پائلنگ میں مشکلات آتی ہیں لیکن راوی برج کی پائلنگ زیادہ مشکلات ہیں، راوی برج 52 پائلنگ میں سے 4پائلنگ مکمل ہوچکی ہیں، کم از کم اجرت کی ادائیگی پر عملدرآمد کرانے کے لئے بھرپور کوشش کررہے ہیں۔

نگراں وزیراعلیٰ پنجاب محسن نقوی نے مزید کہا کہ تمام مسیحیوں بھائیوں کو کرسمس کی مبارک ہوں، ہم مسیحی بھائیوں کی خوشیوں میں برابر کے شریک ہیں، گرجا گھروں کی سکیورٹی کو یقینی بنا رہے ہیں، قائد اعظم ؒ کے نظریہ کے مطابق مسیحی برادری کی ہر خوشی میں ان کے ساتھ ہیں۔