امریکہ میں مقیم معروف پاکستانی بزنس مین تنویر احمد نے اسلام آباد کی نیشنل یونیورسٹی آف سائنس اینڈ ٹیکنالوجی (نسٹ) کو 9 ملین ڈالر کے فنڈ دینے کا اعلان کر دیا۔

تفصیلات کے مطابق احمد تنویر نے آرمی چیف جنرل عاصم منیر کے ملکی سالمیت کے متعلق فیصلوں اور اقدامات سے متاثر ہو کر نسٹ کے لیے بڑی فنڈنگ کا اعلان کیا اور اس اہم شراکت کا مقصد معیاری تعلیم کے لیے اسکالرشپ فراہم کر کے پسماندہ طلبہ کی مدد کرنا ہے۔

تنویر احمد کی جانب سے فراہم کردہ رقم سے سالانہ تقریباً 200 طلباء مستفید ہونگے اور یہ اقدام پاکستان کی کسی بھی پبلک سیکٹر یونیورسٹی میں اپنی نوعیت کا پہلا منصوبہ ہے جو کہ ہزاروں پاکستانی خاندانوں کی زندگیوں کو بدل کر دائمی اثرات مرتب کرنے کا سبب بنے گا۔

بزنس مین تنویر احمد نے نسٹ انفارمیشن ٹیکنالوجی (IT) ٹاور کو پاکستان کی ڈیجیٹل صلاحیت کو بروئے کار لانے اور اس کی معاشی خوشحالی میں حصہ ڈالنے کے لیے انتہائی اہم اور بہترین پلیٹ فارم قرار دیا ہے۔

مستحق طلباء کو ہر سال ہائر ایجوکیشن کمیشن کے ذریعے وظائف ملیں گے اور اس منصوبے کے پیش نظر میرٹ اور ضرورت مند طلباء پر توجہ دی جائے گی۔

اس کے علاوہ تنویر احمد نوجوانوں کو بااختیار بنانے اور ملک کی ترقی میں اپنا حصہ ڈالنے کے لیے سمندر پار پاکستانیوں کی اجتماعی ذمہ داری پر بھی یقین رکھتے ہیں۔