پاکستان تحریک انصاف کے سینئر رہنما و سابق وفاقی وزیر فواد چوہدری کا 6 روزہ جسمانی ریمانڈ منظور کر لیا گیا ہے۔

تفصیلات کے مطابق اسلام آباد کی احتساب عدالت نے زمین کی خریداری میں خورد برد سے متعلق کیس میں فواد چوہدری کا 6 روزہ جسمانی ریمانڈ منظور کر لیا ہے۔

فواد چوہدری کے وکیل فیصل چوہدری نے سماعت کے دوران دلائل پیش کیے کہ بینکنگ ٹرانزیکشن کا ریکارڈ ہے تو عدالت کے سامنے رکھیں، مجھے بولنے دیں، ورنہ میری آواز ہائیکورٹ تک پہنچ جائے گی۔

نیب پروسیکیوٹر نے کہا کہ نیب نے بینکنگ ٹرانزیکشن تو عدالت کے سامنے رکھ دی ہیں۔

وکیل فیصل چوہدری نے جواب دیا کہ فواد چوہدری کی بینکنگ ٹرانزیکشن ہمیں تو نہیں دی گئی، ہم فواد چوہدری کے جسمانی ریمانڈ کی مخالفت کرتے ہیں، میرا بینک اکاؤنٹ کوئی اور کیسے چلا سکتا ہے؟ فواد چوہدری کو انکوائری اسٹیج پر گرفتار کیا گیا، فواد چوہدری کو صرف انتخابات نہ لڑنے کے مقاصد کے باعث گرفتار کیا گیا۔

احتساب عدالت نے فواد چوہدری کا 6 روزہ جسمانی ریمانڈ منظور کرتے ہوئے تفتیشی افسر کو ہدایت دی کہ تفتیش مکمل کر لیں اور وکلاء سے ملاقات بھی کرا دیں۔

فواد چوہدری کو 5 جنوری کو دوبارہ عدالت پیش کیا جائے گا۔