میئر کراچی بیرسٹر مرتضیٰ وہاب نے تجاوزات کے خلاف آپریشن جاری رکھنے کی ہدایت کردی ہے۔

میئر کراچی بیرسٹر مرتضیٰ وہاب کی صدارت میں کے ایم سی کے مختلف محکموں کا اجلاس ہوا جس میں میئر کراچی نے طارق روڈ اور اس کے اطراف میں ڈبل پارکنگ اور پتھارے فوری ہٹانے کی ہدایت کردی۔

بیرسٹر مرتضیٰ وہاب نے کہا کہ محکمہ انسداد تجاوزات کے جو افسران دی گئی ہدایت پر عمل نہیں کریں گے ان کے خلاف فوری کارروائی عمل میں لائی جائے گی۔

میئر کراچی نے محکمہ انسداد تجاوزات کو ہدایت کرتے ہوئے کہا کہ شہر میں تجاوزات کے خلاف آپریشن کو جاری رکھا جائے، کے ایم سی کی سڑکوں پر بل بورڈز قواعد کے مطابق لگائے جائیں۔

انہوں نے کہا خلاف ضابطہ لگائے گئے بل بورڈز فوری ہٹائے جائیں، انڈر پاسز اور پیڈ سٹرین برجز کو بہتر بنانے کے لیے اقدامات کئے جائیں۔

ان کا کہنا تھا کہ انڈر پاسز کی خوبصورتی اور دلکشی کے لیے مختلف اداروں سے تعاون حاصل کیا جائے، انڈر پاسز میں ان کمپنیوں اور اداروں کے بل بورڈز لگائے جائیں جو ان انڈر پاسز کی دیکھ بھال کو بھی یقینی بنائیں۔

بیرسٹر مرتضیٰ وہاب کہتے ہیں کہ کے ایم سی کی تمام زمینوں کو محفوظ بنایا جائے، کے ایم سی کی آمدنی میں اضافے کے لیے اقدامات کیے جائیں تاکہ کے ایم سی اپنے پاؤں پر کھڑی ہوسکے۔

انہوں نے ہدایت دیتے ہوئے کہا کہ کے ایم سی کی مختلف خدمات کو آؤٹ سورس کیا جائے تاکہ اس سے بہتر آمدنی ہوسکے اور ریونیو جمع کرنے والے محکمے اپنے اپنے ٹارگٹ پورے کریں۔۔

میئر کراچی کہتے ہیں کہ یوسف گوٹھ بس ٹرمینل میں پارکنگ میں مزید پارکنگ کی گنجائش نکالی جائے تاکہ زیادہ بسیں پارک ہوسکیں اور یوسف گوٹھ بس ٹرمینل کی شاپ سے کرائے کی مد میں بقایہ جات فوری وصول کیے جائیں۔