اسلام آباد: صدر مملکت ڈاکٹر عارف علوی اور نگران وزیر اعظم انوار الحق کاکڑ نے ڈیرہ اسماعیل خان میں سیکیورٹی فورسز پر دہشت گرد حملے کی مذمت کی ہے۔

تفصیلات کے مطابق صدر مملکت ڈاکٹر عارف علوی نے ڈیرہ اسماعیل خان میں سیکیورٹی فورسز پر دہشت گرد حملے کی شدید مذمت کرتے ہوئے کہا کہ شہداء کی قربانیاں رائیگاں نہیں جائیں گی۔

صدر مملکت نے کہا کہ ایسی بزدلانہ کارروائیاں ہمارے سیکیورٹی اہلکاروں کے عزم کو متزلزل نہیں کر سکتیں۔

صدر عارف علوی نے سوگوار خاندانوں سے دلی ہمدردی کا بھی اظہار کیا۔

دوسری جانب نگران وزیر اعظم انوار الحق کاکڑ نے بھی ڈیرہ اسماعیل خان میں سیکیورٹی فورسز پر دہشت گردوں کے حملے کی مذمت کرتے ہوئے کہا کہ ایسی بزدلانہ کارروائیوں سے سیکیورٹی فورسز کے حوصلے پست نہیں کیے جا سکتے۔

انوار الحق کاکڑ نے کہا کہ دہشت گردی کے خلاف جنگ میں جانوں کا نذرانہ پیش کرنے والے شہداء کو پوری قوم سلام پیش کرتی ہے۔

نگران وزیراعظم نے سوگوار خاندانوں کے ساتھ ہمدردی کا اظہار کیا اور مرحوم کی روح کے لئے دعا کی۔

واضح رہے کہ سیکیورٹی فورسز نے ڈیرہ اسماعیل میں مختلف علاقوں میں کارروائی کی جس کے دوران مجموعی طور پر 27 دہشت گرد ہلاک ہوئے اور 17 دہشت گرد مارے گئے۔

دہشت گردوں کے مختلف خودکش دھماکوں کے نتیجے میں عمارت گرگئی جس سے متعدد اموات ہوئیں جبکہ اس دوران 23 بہادر سپاہیوں نے شہادت کو گلے لگایا۔