صدر مملکت ڈاکٹر عارف علوی نے کہا ہے کہ بچوں کی تعلیم کیلئے مساجد و مدارس کے ساتھ مل کر ہر ممکن کوشش کرنے کی ضرورت ہے۔

تفصیلات کے مطابق صدر مملکت ڈاکٹر عارف علوی سے گورنر ہاؤس کراچی میں دارالعلوم کراچی کے علماء کے وفد نےملاقات کی۔

 اس موقع پر صدر مملکت ڈاکٹر عارف علوی نے کہا کہ مذہبی پلیٹ فارمز کو ملک میں خواندگی اور ذہنی تندرستی کے فروغ کے لیے استعمال کیا جا سکتا ہے، تعلیم اور ذہنی تندرستی کو فروغ دینے کے لیے پیش امام اہم کردار ادا کرسکتے ہیں، ہنی صحت اور تندرستی کیلئے ایک ٹول کٹ کو جلد از جلد تیار کیا جانا چاہیے۔

صدر مملکت ڈاکٹر عارف علوی نے صحت اور تعلیم کے رہنما خطوط پر عمل کرانے کے لیے معاشرے کے سرکردہ افراد اور مساجد کے پیش اماموں کی شمولیت پر زوردیا۔

انہوں نے کہا کہ مساجد اور دینی مدارس کو ملک میں فروغ تعلیم اور فلاح و بہبود کے لیے استعمال کیا جا سکتا ہے، ملک کے تقریباً 36 فیصد اسکول نہ جانے والے بچوں کی تعلیم کیلئے مساجد و مدارس کے ساتھ مل کر ہر ممکن کوشش کرنے کی ضرورت ہے۔