تحریک انصاف کے سابق ایم پی اے ملک واصف مظہر راں نے پیپلز پارٹی میں شمولیت کا اعلان کر دیا ہے۔

تفصیلات کے مطابق پاکستان تحریک انصاف کے رہنما ملک واصف مظہر راں نے پی ٹی آئی کو خیر باد کہہ دیا ہے، پاکستان تحریک انصاف کے رہنما ملک واصف مظہر راں نے پیپلز پارٹی میں شمولیت اختیار کر لی ہے۔

یوسف رضاگیلانی کے ہمراہ ملتان میں پریس کانفرنس کرتے ہوئے ملک واصف مظہر راں نےکہا کہ پی ٹی آئی چھوڑ کر پیپلزپارٹی میں شمولیت اختیار کررہا ہوں، پاکستان پیپلز پارٹی نے پاکستان کی بات کی ہے، پاکستان پیپلزپارٹی ہی ملک کو آگے لیکر جاسکتی ہے، بلاول بھٹو زرداری کی قیادت میں پاکستان ترقی کرے گا۔

اس موقع پر سابق وزیر اعظم اور رہنما پیپلز پارٹی یوسف رضاگیلانی نےکہا کہ ہم واصف راں کے دوستوں و احباب کو پیپلز پارٹی میں خوش آمدید کہتے ہیں، جنوبی پنجاب میں پیپلز پارٹی اچھا پرفارم کرے گی، ایسی فضا بنانا کے مسلم لیگ (ن) الیکشن جیتے گی یہ غلط ہے، ہم الیکشن لڑیں گے۔

انہوں نے کہا کہ یپلزپارٹی ایک جدوجہد کا نام ہے جبکہ پیپلز پارٹی ایک نظریاتی جماعت ہے، بھٹو نے ملک کو آئین دیا اور ایٹمی طاقت بنایا جبکہ آئین پاکستان کو ہم نے اصل صورت میں بحال کیا، جب ہم نے ترمیم کی آئین میں تو کسی نے بھی اس کی مخالفت نہیں کی۔

یوسف رضاگیلانی نے یہ بھی کہا کہ پیپلز پارٹی نے ملک کو بحرانوں سے نکالا ، جمہوریت اور عوام کےحقوق کیلئے پیپلزپارٹی مشعل راہ ہے،  یقین ہے عوام اپنا فیصلہ ہمارے حق میں دیں گے۔

سابق وزیر اعظم اور رہنما پیپلز پارٹی یوسف رضاگیلانی نے مزید کہا کہ ہم الیکشن کے لیے ہمیشہ سے ہی تیار تھے اگر اب صدر پاکستان اور الیکشن کمیشن نے یہ فیصلہ کیا ہے کہ انتخابات 8 فروری کو ہوں گے تو ہم اس کے لیے بھی تیار ہیں۔