گورنر مدینہ منورہ شہزادہ فیصل بن سلمان کو ہلال پاکستان کے اعزاز سے نوازا گیا ہے۔

تفصیلات کے مطابق حکومت پاکستان نے شہزادہ فیصل بن سلمان بن عبدالعزیز السعود کو ”ہلالِ پاکستان“ کا سول اعزاز دیا۔

پاکستان کے لیے خدمات کے شعبے میں  شہزادہ فیصل کی شاندار خدمات کے اعتراف میں، پاکستان کے صدر نے شہزادہ فیصل بن سلمان بن عبدالعزیز السعود کو اعزاز سے نوازتے ہوئے خوشی کا اظہار کیا۔

شہزادہ فیصل کو یہ اعزاز مدینہ المنورہ گورنر ہاؤس میں منعقدہ ایک تقریب میں پاکستان کے سفیر احمد فاروق اور پاکستان کے دیگر سفارتکاروں نے پیش کیا۔

شہزادہ فیصل بن سلمان بن عبدالعزیز السعود پاکستان میں سلطانہ فاؤنڈیشن سمیت مختلف فلاحی اداروں اور ترقیاتی اداروں کے ساتھ سرگرم عمل رہے ہیں، 1990 سے اس فاؤنڈیشن کے زیر انتظام اسکولوں سے 120,000 سے زیادہ طلباء فارغ التحصیل ہو چکے ہیں۔

مدینہ کے گورنر کی حیثیت سے انہوں نے مملکت میں ملازم پاکستانی افرادی قوت کی سہولت کے لیے اہم کردار ادا کیا ہے۔

ان کی فعال حمایت کی وجہ سے، پاکستانیوں کو حکومت سعودی عرب کی جانب سے موت کے معاوضے کے دعووں، سروس کے اختتامی فوائد، قیدیوں کے لیے جرمانے کی معافی اور مملکت میں پاکستانی افرادی قوت کے مزدوری کے دیگر حقوق کی جلد کارروائی کے لیے موثر خدمات کی فراہمی ملی ہے۔

اس موقع پر سفیر پاکستان احمد فاروق نے کہا کہ یہ ایوارڈ دونوں ممالک کے درمیان مضبوط برادرانہ تعلقات اور باہمی دلچسپی کے شعبوں میں ان کے مسلسل تعاون کا عکاس ہے، اسلامی جمہوریہ پاکستان کے لوگ شاہی خاندان اور مقدس مقامات کے لیے بڑی عقیدت رکھتے ہیں۔

شہزادہ فیصل بن سلمان نے اس اعزاز پر پاکستانی عوام کا شکریہ ادا کیا اور کہا کہ تاریخی، ثقافتی اور مذہبی رشتوں میں جڑے ہمارے برادرانہ تعلقات وقت کی کسوٹی پر کھڑے رہے ہیں اور ہم اس رشتے کو ہر سطح پر قدر کی نگاہ سے دیکھتے ہیں۔

ایوارڈ کی تقریب میں سفیر پاکستان کے ہمراہ  قونصل جنرل خالد مجید، نائب قونصل عدنان جاوید، سعودی عرب میں مقیم پاکستانی صحافیوں کے فورمز، پاکستان جرنلسٹ فورم، اوورسیز میڈیا فورم، یونائٹڈ میڈیا فورم نے حکومت پاکستان کے اس اقدام کو سراہا۔