وفاقی وزیر صحت ڈاکٹر ندیم جان نے کہا ہے کہ میں تمباکو مصنوعات کیخلاف چٹان کی طرح کھڑا رہوں گا۔

تفصیلات کے مطابق گزشتہ روز تمباکو سے پاک بچوں کی مہم ”کمپین فارٹوبیکوفری کڈز(سی ٹی ایف کے) کے ریجنل ڈائریکٹر جنوبی ایشیاء اور وفاقی وزیر صحت ڈاکٹر ندیم جان کی انسداد تمباکو کے حوالے سے جاری کوششوں کے سلسلے میں اہم ملاقات ہوئی، ملاقات میں ہیلتھ لیوی بل کے فوری نفاذ پر غور کیا گیا۔

اس موقع پر وفاقی وزیر صحت ڈاکٹر ندیم جان نے کہا کہ پاکستان تمباکو کنٹرول کے حوالے سے پُرخلوص نیت کے ساتھ اپنی کوششیں جاری رکھے گا۔

انہوں نے انسداد تمباکو کیلئے پاکستان کے مضبوط عزم کا بھی اعادہ کیا۔

ڈاکٹر ندیم جان نے نیشنل ہیلتھ سروسز ریگولیشنز اینڈ کوآرڈینیشن حکومتِ پاکستان کی نمائندگی کرتے ہوئے صحت عامہ کے لیے وزارت صحت کی غیر متزلزل حمایت کا یقین دلاتے ہوئے کہا کہ وزارتِ صحت تمام شہریوں خصوصاً بچوں، نوجوانوں اور خواتین کی صحت اور بہبود کو یقینی بنانے کے لیے پُرعزم ہے۔

انہوں نے کہا کہ ہم اپنے شہریوں کی صحت کے تحفظ کو مدِنظررکھتے ہوئے نیکوٹین مصنوعات سے ہونے والے نقصانات سے آگاہی کیلئے نمایاں تصویر والے لاگو ڈیزائن کریں گے اور اس حوالے سے مرتب کی گئی سخت پالیسز پرعمل درآمد کو یقینی بنائیں گے تاکہ تمباکو مصنوعات کے نقصان سے لوگوں کو زیادہ سے زیادہ آگاہ کیا جاسکے۔

وفاقی وزیر صحت نے (سی ٹی ایف کے) کی قابلِ ستائش کوششوں کا اعتراف کرتے ہوئے ہیلتھ لیوی بل پر بھی مکمل تعاون کا یقین دلایا اور کہا کہ وہ اس بل کو آرڈیننس میں تبدیل کرنے کیلئے میدانِ عمل میں آئیں گے اور اس حوالے سے صحت کولاحق خطرات پر اپنی تشویش سے وزیر اعظم کو آگاہ کریں گے۔

انہوں نے سی ٹی ایف کے پر زور دیا کہ وہ پاکستان میں آئے روز نئی نئی نقصان دہ نکوٹین مصنوعات کے بارے میں بھی وزارت صحت کو آگاہ رکھے تاکہ ایسی مصنوعات کے انسداد کیلئے بروقت کارروائی کی جاسکے اور ایسی مصنوعات کے پھیلاؤ کو روکا جاسکے۔

ڈاکٹر ندیم جان نے تمباکو مصنوعات سے متعلق چیلنجز سے نمٹنے میںسی ٹی ایف کے کے ساتھ تعاون کرنے کے عزم کا اعادہ کرتے ہوئے کہا کہ میں تمباکو، نیکوٹین یا ایسی دیگر مصنوعات کے خلاف صحت کو لاحق خطرات کے خلاف چٹان کی طرح کھڑا ہوں۔

اس حوالے سے انہوں نے سی ٹی ایف کے پر بھی زور دیا کہ وہ انہیں ایسی تمام مصنوعات سے آگاہ رکھے جو صحت کیلئے نقصان کا باعث بن رہی ہیں تاکہ ہم سب مل کر اس لعنت کا جڑ سے خاتمہ کرسکیں۔

ریجنل ڈائریکٹر ساؤتھ ایشیاء سی ٹی ایف کے ڈاکٹر ماہین ملک نے کہا کہ ہم اپنے بچوں اور نوجوانوں کو تمباکو مصنوعات کے نقصانات سے بچانے کے لیے حکومت پاکستان کے ساتھ بھرپور تعاون کیلئے تیار ہیں۔

انہوں نے پاکستان میں تمباکو مصنوعات کے خلاف حکومت کے ساتھ تعاون جاری رکھنے کے عزم ظاہر کرتے ہوئے کہا کہ صحت مند اور تمباکو سے پاک پاکستان کیلئے تمباکو کنٹرول پالیسی پر مستقبل میں مل کر کام کرتے رہیں گے۔