استحکام پاکستان پارٹی (آئی پی پی) کے صدر عبدالعلیم خان نے کہا ہے کہ پاکستان میں مستحقم حکومت کا ہونا ضروری ہے، امید ہے کہ اس بار بننے والی حکومت 5 سال مکمل کرے گی۔

عبدالعلیم خان نے خانیوال میں پریس کانفرنس کرتے ہوئے کہا کہ پنجاب میں ہمارے پچاس سے زائد ممبران الیکشن لڑ رہے ہیں، زراعت ہماری ریڑھ کی ہڈی ہے، ہمارے پارٹی چیئرمین کسانوں میں رول ماڈل ہیں، ہمارے منشور میں زراعت کے متعلق بہت سی سہولیات ہیں۔

انہوں نے کہا کہ ہم صرف اعلان نہیں کر رہے، سوچ سمجھ کر اعلان کر رہے ہیں، پوری پلیننگ موجود ہے کہ کیسے فری بجلی دینی ہے، ہمارے ملک میں وسائل موجود ہیں ضرورت صرف پلانگ کی ہے، ہم کاروباری لوگ ہیں بہت سوچ سمجھ کر بات کرتے ہیں۔

صدر آئی پی پی نے کہا کہ پاکستان کے پاس بہت وسائل ہیں اور کس طرح بجلی مفت دینی ہیں ہم اس بات کو سمجھتے ہیں، دس سے پندرہ کروڑ کی گاڑی میں وہی پیٹرول ڈالا جاتا ہے وہی پیٹرول غریب کو بھی دیا جاتا ہے، موٹر سائیکل والوں کے لیے پیٹرول فری کریں گے، 300 یونٹ سے کم بجلی کا بل فری کریں گے اور چھوٹے کسانوں کے لیے ٹیوب ویل کی بجلی فری کریں گے۔

عبدالعلیم خان نے مزید کہا کہ یقین رکھیں کہ الیکشن ہوں گے اور گرم جوشی سے ہوں گے، سردی کی وجہ سے کمپین متاثر ہے مگر ہم پرجوش ہیں۔