ملک بھر میں دھند نے نظام زندگی کو مکمل مفلوج کردیا ہے، موٹر وے کئی مقامات پر بند ہونے سے مسافر رل گئے ہیں۔

تفصیلات کے مطابق اسلام آباد سمیت ملک کے مختلف شہروں میں دھند کا راج برقرار ہے جس کے باعث راستے دھندلا گئے ہیں۔

وفاقی دارالحکومت اسلام آباد سمیت لاہور، پشاور اور ملک کے دیگر شہر شدید دھند کی لپیٹ میں ہیں، جس کی وجہ سے شہریوں کو مشکلات کا سامنا کرنا پڑ رہا ہے۔

راستے دھندلانے سے سڑکوں پر ٹریفک کی روانی سست روی کا شکار ہے جبکہ ایئر پورٹس پر پروازوں کا شیڈول بھی متاثر ہے۔

واضح رہے کہ دھند میں سفر کرنا خطرناک ہو سکتا ہے اور دھند کے دوران غیر ضروری سفر سے اجتناب کرنا چاہیے، دھند کے دوران پاکستان نیشنل ہائی ویز اینڈ موٹرویز اتھارٹی عوام کی حفاظت کے لیے تنبہیہ پیغامات، آگہی مہم اور دوران سفر احتیاطی تدابیر جاری کرتی ہیں۔

پاکستان ہائی ویز اور موٹرویز کی جاری کردہ احتیاطی تدابیر کے مطابق کسی بھی ناخوشگوار حادثے سے بچنے کے لیے دھند میں غیر ضروری سفر سے اجتناب کریں اور سفر شروع کرنے سے قبل نیشنل ہائی وے اینڈ موٹرویز اتھارٹی کی ہیلپ لائن 130 پر کال کر کے دھند کی صورتحال سے متعلق معلومات حاصل کریں۔

دھند میں رات کے اوقات میں سفر کرنے سے گریز کریں اگر سفر کرنا انتہائی ضروری ہو تو گاڑی کی ہیڈ لائٹس لو بیم پر رکھیں کیونکہ ہائی بیم سے روشنی دھند میں منعکس ہو جاتی ہے جس سے حد نگاہ شدید متاثر ہوتی ہے۔

یاد رہے کہ موٹروے اور قومی شاہراؤں پر سفر کے دوران کسی مشکل صورتحال میں موٹروے پولیس کی ہیلپ لائن 130 پر مدد کے لیے کال کر سکتے ہیں۔