پاکستان مسلم لیگ ن کے رہنما رانا مشہود نے کہا ہے کہ بلاول صاحب جہاں سے دل چاہے الیکشن لڑیں، پاکستان مسلم لیگ ن کا ہے اور رہے گا۔

لیگی رہنما رانا مشہود نے کراچی میں میڈیا سے گفتگو کرتے ہوئے کہا کہ کے فور کا منصوبہ لیٹ کیا گیا، ہمارا فوکسس مسائل پر ہے۔

انہوں نے کہا کہ کراچی سمیت پورے سندھ کے عوام کی خدمت کریں گے، پیپلز پارٹی نے پچھلے پندرہ سالوں میں سندھ کو تباہ و برباد کردیا ہے۔

رانا مشہود نے کہا کہ ایم کیو ایم چاہتی ہے کہ کراچی میں امن و امان ہو، اسی لئے ہمارا ایم کیو ایم سے اتحاد ہوا ہے، ایم کیو ایم کا کراچی میں اسٹیک ہے۔

لیگی رہنما نے کہا کہ پیپلز پارٹی کے امیدوار نے شہباز شریف کے خلاف بوگس اعتراض اٹھائے تھے، ٹریبونل نے پیپلز پارٹی کے الزام مسترد کر دیے ہیں، عدالت نے این اے 242 سے شہباز شریف کے کاغذات نامزدگی درست قرار دیے۔

انہوں نے مزید کہا کہ شہباز شریف کراچی سے مسلم لیگ ن کی نمائندگی کرنے کے لیے میدان میں اتر چکے ہیں، ہم جمہوریت پر یقین رکھتے ہیں۔