سکھر: پیپلزپارٹی کے مرکزی رہنما سید ناصر حسین شاہ نے کہا ہے کہ بلاول بھٹو وزیر اعظم بن کر ملک کا تشخص بحال کرائیں گے۔

ناصر حسین شاہ نے بول نیوز سے خصوصی گفتگو کرتے ہوئے کہا کہ پیپلز پارٹی آٹھ فروری کو ملک میں سرپرائز دے گی، وفاق میں حکومت بنائیں گے بجلی، گیس کی قیمتیں کم کریں گے۔

انہوں نے کہا کہ ملک میں تمام طبقہ فکر کے لوگوں کو علاج معالجے کی مفت سہولت فراہم کی جائے گی، مزدور کارڈ، کسان کارڈ دیں گے، دل کے امراض، کینسر، گردوں، جگر کا علاج مفت کردیں گے۔

رہنما پی پی نے کہا کہ دوکانوں کے سیلز مین، گھروں کے ملازمین، رکشہ ڈرائیور سمیت مزدور طبقے کو لیبر کارڈ دیے جائیں گے، تین سو یونٹس تک بجلی استعمال کرنے والوں کو سولر سسٹم سے فری بجلی دیں گے۔

ناصر حسین شاہ نے مزید کہا کہ عوام کو ریلیف دیں گے، مہنگائی کا خاتمہ کریں گے، بلاول بھٹو وزیر اعظم بن کر ملک کا تشخص بحال کرائیں گے۔