جمیعت علماء اسلام (جے یو آئی) کے امیدواروں کو ٹکٹوں کی تقسیم پر دستخط سے متعلق جواب الیکشن کمیشن میں جمع کرادیا گیا ہے۔

تفصیلات کے مطابق جمیعت علماء اسلام کی جانب سے الیکشن کمیشن کے خط کا جواب دے دیا گیا ہے۔

الیکشن کمیشن میں جمع کرائے گئے جواب میں کہا گیا کہ جے یو آئی ف کے امیدواروں کو ٹکٹ امیر جمیعت مولانا فضل الرحمان کے دستخط سے جاری کیے جائیں گے۔

دوسری جانب جمعیت علماء اسلام نے الیکشن کمیشن سے لیول پلئینگ فیلڈ اور امیدواروں کو سیکیورٹی کی فراہمی کا مطالبہ بھی کیا ہے، چیف الیکشن کمشنر کے نام خط میں کہا کہ انتخابی مہم اور انتخابات کے دوران کسی بھی نقصان کی ذمہ داری الیکشن کمیشن اور امن وامان قائم رکھنے والے اداروں پر ہو گی۔

خط میں مزید لکھا گیا کہ الیکشن کے دوران امن و امان قائم رکھنا بھی الیکشن کمیشن کی ذمہ داری ہے، جے یو آئی کی طرف سے مطالبہ کیا گیا کہ ہمارے قومی اور صوبائی اسمبلی کے امیدواروں کو معقول سیکیورٹی فراہم کی جائے تاکہ جمعیت علمائے اسلام کو لیول پلیئنگ فیلڈ مل سکے۔

بعدازاں جمعیت علماء اسلام (جے یو آئی) کے سربراہ مولانا فضل الرحمان کا کہنا تھا کہ میں سمجھتا ہوں کہ الیکشن نہیں ہوسکیں گے، انتخابات کچھ دن مؤخر ہوجائیں تو کوئی حرج نہیں، الیکشن کمیشن ہماری درخواست پر غور کرے۔

مولانا فضل الرحمان نے کہا تھا کہ نئی حکومت جون میں بجٹ نہیں دے سکےگی، الیکشن میں جانا چاہتے ہیں لیکن ماحول بھی ہونا چاہیے، موجودہ حالات میں کیسے الیکشن مہم چلا سکتے ہیں۔