ملک بھر میں نئے سال 2024 کا سورج مکمل آب وتاب کے ساتھ طلوع ہوگیا ہے اور روشنی نے پر پھیلا لئے ہیں۔

تفصیلات کے مطابق ملک بھر میں سال نو کے استقبال کیلئے مساجد میں نماز فجر کے بعد پاکستان کی ترقی، خوشحالی اور امن وامان کی بہتری کے لئے دعائیں مانگی گئیں۔

 نئے سال کے پہلے سورج کا استقبال کرنے والے شہریوں نے امید ظاہر کی ہے کہ پاکستان میں 2024 کا نیا سورج نئی امید لے کر آئے گا، وطن عزیز پاکستان دن دگنی اور رات چوگنی ترقی کرے گا۔

شہریوں کا یہ بھی کہنا تھا کہ نیا سال پاکستان کے لئے کامیابیوں کا سال ثابت ہوگا۔

بعدازاں نئے سال کے پہلے دن محکمہ موسمیات نے موسم کے حوالے سے اہم پیشگوئی کی ہے کہ اسلام آباد میں موسم سرد اور خشک رہے گا جبکہ صبح کے اوقات میں بعض مقامات پر دھند کا امکان ہے، ادھر خیبرپختونخوا کے بیشتر اضلاع میں موسم سرد اور خشک جبکہ بالائی اضلاع میں شدید سرد رہے گا تاہم چارسدہ، مردان، نوشہرہ، صوابی، پشاور، ڈی آئی خان اور گردونواح میں صبح اور رات کے اوقات میں دھند چھائے رہنے کا امکان ہے۔

محکمہ موسمیات نے بتایا کہ پنجاب کے بیشتر اضلاع میں موسم سرد اور خشک جبکہ مری، گلیات اور گردونواح میں شدید سرد رہے گا، تاہم بہاولپور، ساہیوال، اوکاڑہ، قصور، لاہور، سیالکوٹ، نارووال، گوجرانوالہ، جہلم، منگلا، فیصل آباد، جھنگ، سرگودھا، منڈی بہاؤالدین، ٹوبہ ٹیک سنگھ، خانیوال، ملتان، خان پور، رحیم یار خان، حافظ آباد، بھکر، لیہ، ڈیرہ غا زی خان اور گر دو نواح میں شدید دھند / اسموگ چھائے رہنے کا امکان ہے جبکہ خطہ پوٹھوہار کے بعض علاقوں میں صبح کے اوقات میں دھند کا امکان ہے۔

رپورٹ میں مزید کہا گیا کہ بلوچستان کے بیشتر اضلاع میں موسم سرد اور خشک جبکہ شمالی اضلاع میں شدید سرد اور مغربی اضلاع میں مطلع جزوی ابر آلود رہے گا جبکہ سندھ کے بیشتر اضلاع میں موسم سرد اور خشک رہے گا، تاہم جیکب آباد، موہنجوداڑو، سکھر، لاڑکانہ ، دادو، گھوٹکی اور پڈعیدن میں صبح اور رات کے اوقات میں دھند واسموگ چھائے رہنے کا امکان ہے۔