پاکستان پیپلز پارٹی کے رہنما ناصر حسین شاہ نے کہا ہے کہ ہمارا قبضہ کراچی پر نہیں کراچی کے لوگوں کے دلوں پر ہوگا۔

ناصر حسین شاہ نے کراچی میں پریس کانفریس کرتے ہوئے کہا کہیہ مکافات عمل ہے ایسے فیصلے ہماری پارٹی کے خلاف بھی آئے ہیں، فیصلہ سنانے والے جج کی بھی بانی پی ٹی آئی بہت تعریف کرتے تھے، بشریٰ بی بی کو داد دوں گا وہ خود فیصلے کے بعد اڈیالہ جیل پہنچیں، پی ٹی آئی کا کوئی رہنما نہیں پہنچا۔

انہوں نے کہا کہ بلاول بھٹو بھی کہہ چکے ہیں کہ پی ٹی آئی کو الیکشن کی اجازت ملنی چاہیے، ہم نے پی ٹی آئی سے الیکشن نشان واپس لینے والے فیصلے کی مخالفت کی۔

رہنما پی پی نے کہا کہ سیکیورٹی اداروں نے شہر میں امن کے لیے قربانیاں دی ہیں، پرامن الیکشن کے انعقاد پر زور دینا چاہیے اشتعال دلانے کی کوشش نہ کی جائے۔

ناصر حسین شاہ نے کہا کہ جو واقعہ ہوا اس کی انکوائری کسی جج سے کروائی جائے، ایم کیوایم کے رہنماؤں سے کہتا ہوں کہ وہ اس مسئلے کو سنجیدہ لیں مزید الجھنیں پیدا نہ کریں۔

انکا کہنا تھا کہ ہمارا قبضہ کراچی پر نہیں کراچی کے لوگوں کے دلوں پر ہوسکتا ہے، پیپلزپارٹی کا کبھی بھتے، بوری بند لاشوں، جلاؤ گھیراؤ کا ریکارڈ نہیں رہا۔

پیپلز پارٹی کے رہنما نے مزید کہا کہ ضلع وسطی میں جو صورتحال بنی اس کی مذمت کرتے ہیں، مجرم کا تعلق کسی بھی پارٹی سے ہو اس کو سزا ملنی چاہیے۔