پنجاب اسمبلی کی نشست پی پی 163 لاہور سے پیپلز پارٹی کے امیدوار فیاض بھٹی کو تیر کے بجائے چینک کا نشان دینے کے معاملے پر سینیٹر تاج حیدر نے چیف الیکشن کمشنر کو خط لکھ دیا۔

تفصیلات کے مطابق پاکستان پیپلز پارٹی کے سنٹرل الیکشن سیل کے انچارج سینیٹر تاج حیدر نے خط میں پی پی 163، پنجاب سے پی پی پی پی کے امیدوار محمد فیاض بھٹی کے نشان کی الاٹمنٹ میں بے ضابطگی پر گہری تشویش کا اظہار کیا ہے۔

سینیٹر تاج حیدر نے خط میں لکھا کہ محمد فیض بھٹی نے 12 جنوری 2024 کو پی پی پی پی کا ٹکٹ متعلقہ ریٹرننگ آفیسر کو جمع کروایا، انہیں ایک آزاد امیدوار کے طور پر درج کیا گیا اور پی پی پی پی کے مطلوبہ نشان “تیر” کی بجائے نشان “کیٹل” الاٹ کیا۔

خط میں کہا گیا کہ یہ غیر متوقع تبدیلی انتخابی عمل کی نیک نامی کے بارے میں سنگین خدشات کو جنم دیتی ہے، ہمیں خدشہ ہے کہ یہ پی پی پی کے امیدوار کو کمزور کرنے کی دانستہ کوشش ہو سکتی ہے اور آئندہ انتخابات کی شفافیت پر سمجھوتہ کر سکتی ہے۔

تاج حیدر نے اپنے خط میں مزید لکھا کہ پی پی 163 کے لیے محمد فیاض بھٹی کو “تیر” کے نشان کی درست الاٹمنٹ کو یقینی بنا کر اس بے ضابطگی کو دور کیا جائے، اس بات کی چھان بین کرنی چاہیے کہ ایسی خرابی کیسے پیش آئی، امید ہے کہ الیکشن کمیشن آف پاکستان اس مسئلے کو حل کرنے کے لیے فوری اور ضروری اقدامات کرے گا۔