پاکستان مسلم لیگ ن کی نائب صدر و چیف آرگنائزر مریم نواز کے لاہور کے حلقے این اے 119 سے کاغذات نامزدگی کی منظوری کے خلاف اپیل ٹریبونل میں دائر کر دی گئی ہے۔

تفصیلات کے مطابق مریم نواز کے کاغذات کی منظوری کے خلاف اپیل ندیم شیروانی نے دائر کی جس میں این اے 119 کے ریٹرننگ افسر کو فریق بنایا گیا۔

درخواست میں مؤقف اختیار کیا گیا کہ مریم نواز نے کاغذات نامزدگی میں حقائق چھپائے، انہوں نے کاغذات میں درست حقائق بیان نہیں کیے۔

درخواست میں استدعا کی گئی کہ اپیلیٹ ٹریبونل مریم نواز کے کاغذات نامزدگی منظوری کو کالعدم قرار دیا جائے۔

واضح رہے کہ عام انتخابات کے لیے امیدواروں کی جانب سے الیکشن ٹریبونل میں کاغذات نامزدگی کی منظوری یا مسترد ہونے کے خلاف اپیلیں جمع کرنے کا سلسلہ آج بھی جاری ہے۔

امیدواروں کی جانب سے الیکشن ٹریبونل میں جمع کرائی گئیں اپیلوں میں سے اب تک 50 اپیلیں سماعت کے لیے منظور کی جا چکی ہیں۔

عام انتخابات کے لیے امیدواروں کی جانب سے الیکشن ٹریبونل میں کاغذات نامزدگی کی منظوری یا مسترد ہونے کے خلاف اپیلیں اپیلیں جمع کرانے کی آج آخری تاریخ ہے جس کے بعد 10 جنوری تک ان اپیلوں پر سماعت ہوگی۔

امیدوار اپنے کاغذات 12 جنوری تک واپس لے سکیں گے جبکہ امیدواروں کو انتخابی نشان 13 جنوری کو دیے جائیں گے اور عام انتخابات 8 فروری کو ہوں گے۔

الیکشن کمیشن کے مطابق ملک بھر میں 28 ہزار 626 کاغذاتِ نامزدگی جمع کرائے گئے تھے۔