اسلام آباد: نگران وزیر اطلاعات و نشریات مرتضیٰ سولنگی نے کہا ہے کہ انتخابات کے انعقاد میں الیکشن کمیشن کی ہر ممکن معاونت کریں گے۔

نگران وفاقی وزیر مرتضیٰ سولنگی نے الیکشن کمیشن کے باہر میڈیا سے گفتگو کرتے ہوئے کہا کہ پی ٹی آئی سے متعلق معاملات کا پی ٹی آئی ہی بہتر بتا سکتی ہے۔

انہوں نے کہا کہ پاکستان میں آزادانہ، منصفانہ، غیر جانبدارانہ اور شفاف انتخابات کرانے کی آئینی ذمہ داری الیکشن کمیشن آف پاکستان کی ہے، نگران حکومت آئینی اور قانونی حکومت ہے، نگران حکومت الیکشن کمیشن کے پیچھے کھڑی ہے۔

مرتضیٰ سولنگی نے کہا کہ الیکشن کمیشن کی مالی، انتظامی اور سیکیورٹی ضروریات پوری کرنے کے آئینی طور پر پابند ہیں، سیکیورٹی کے مسائل حقیقی ہیں، ہمیں ان کا ادراک ہے، انہیں بہتر کریں گے۔

نگران وزیر اطلاعات نے کہا کہ ملک میں سوال اٹھانے پر کوئی پابندی نہیں، سیاست آجکل ہمارا قومی مشغلہ بن چکا ہے، سیاست ضرور ہونی چاہیے سیاست پر پابندی نہیں ہے، سیاست ملک کے مستقبل سے جڑی ہونی چاہیے۔

انہوں نے کہا کہ انتخابات کے موقع پر اب سوشل میڈیا پر فیک نیوز پھیلیں گی، میڈیا کا کام ہے کہ ایسے حقائق پر گہری نظر رکھے۔

مرتضیٰ سولنگی نے مزید کہا کہ انتخابات سے محض کچھ دن دور ہیں، انشاء اللہ انتخابات 8 فروری 2024ء بروز جمعرات کو ہوں گے، الیکشن کمیشن کے پاس انتخابات کے حوالے سے تمام اختیارات ہیں۔