اسلام آباد: وزیر اعظم کے ترقیاتی بجٹ پر 53 ارب روپے کا کٹ لگانے کی تیاری کر لی گئی ہے۔

ذرائع کے مطابق وزیر اعظم اقدامات کے تحت ترقیاتی بجٹ کیلئے فنڈز روکنے کی تجویز دے گئی ہے، تاہم تجاویز منظوری کیلئے قومی اقتصادی کونسل میں پیش کی جائیں گی۔

ذرائع نے بتایا ہے کہ جولائی سے دسمبر 2023 وزیر اعظم اقدامات کے تحت تقریباً 2 ارب جاری کیے جبکہ بجٹ میں 80 ارب روپے کے 9 منصوبے شامل تھے۔

ذرائع کا کہنا ہے کہ بجٹ میں زرعی ٹیوب ویلز کی شمسی توانائی پر منتقلی کے پروگرام کیلئے 30 ارب مختص تھے جبکہ وزیراعظم لیپ ٹاپ اسکیم کیلئے 10 ارب روپے مختص کیے تھے۔

ذرائع کے مطابق چھوٹے قرضوں کیلئے وزیر اعظم یوتھ پروگرام کے تحت 10 ارب روپے مختص تھے جبکہ وزیر اعظم یوتھ اسکل ڈویلپمنٹ پراجیکٹ کیلئے 5 ارب روپے مختص کیے گئے تھے۔

اس کے علاوہ بجٹ میں پاکستان انڈومنٹ فنڈبرائے ایجوکیشن کیلئے 5 ارب روپے مختص تھے جبکہ زیراعظم آئی ٹی اسٹارپ اور وینچر کیپیٹل پروگرام کیلئے 5 ارب روپے مختص کیے گئے تھے۔

ذرائع نے مزید بتایا کہ بجٹ میں وزیراعظم اسپورٹس اقدامات کیلئے 5 ارب روپے مختص کیے گئے تھے جبکہ وزیر اعظم کے سبز انقلاب پروگرام کیلئے 5 ارب روپے مختص اور خواتین کو بااختیار بنانے کے پروگرام کیلئے 5 ارب روپے مختص کیے تھے۔