نگران وزیر اطلاعات بلوچستان جان اچکزئی نے کہا کہ پاکستان میں جیش العدل جیسی تنظیم کا کوئی وجود نہیں۔

نگران صوبائی وزیر جان اچکزئی نے کوئٹہ میں پریس کانفرنس کرتے ہوئے کہا کہ ماہ رنگ لاپتہ افراد کے مسئلے پر پاکستان کو بدنام کرنے کی کوشش کر رہی تھیں، پاکستان کو ان دنوں کئی محاذوں پر کامیابیاں ملی ہیں۔

انہوں نے کہا کہ مذموم مقاصد کیلئے اسلام آباد کو مسکن بنایا گیا، اگر کوئی دہشت گردی کا واقعہ ہوا تو ذمےدار کون ہوگا، یہ دہشت گردی کے واقعے کا الزام بھی ریاست پر ڈال دیں گے۔

انکا کہنا ہے کہ کوئی دشمن ایجنسی مظاہرین کو نشانہ بناکر فائدہ اٹھا سکتی ہیں، مظاہرین کو غیر قانونی فنڈنگ ہورہی ہے، کسی بھی دہشت گردی کے واقعے کو روکنا ناممکن ہو جاتا ہے، یہاں بھی ہر وقت کوئی واقعہ ہو سکتا ہے۔

جان اچکزئی نے مزید کہا کہ ماہ رنگ بلوچ نے ایران میں ہلاک دہشت گردوں کو رشتے دار تسلیم کیا۔ غیر قانونی افراد کو کوئی ڈھیل نہ دی جائے۔