اسلام آباد: مرکز میں حکومت سازی کے معاملے پر مجوزہ حکومتی اتحاد کے تمام نو منتخب ارکان کو آئندہ ہفتے اسلام آباد پہنچنے کی ہدایت دے دی گئی ہے۔

ذرائع کے مطابق اتحادی حکومت کی مشترکہ پارلیمانی پارٹی کا اجلاس بھی آئندہ ہفتے ہوگا، شہباز شریف کو اتحادی جماعتیں وزارت اعظمی کا مشترکہ امیدوار نامزد کریں گی۔

ذرائع کا کہنا ہے کہ پارلیمانی پارٹی میں اتحادی جماعتیں شو آف پاور بھی کریں گی، نامزدگی کے بعد قومی اسمبلی کا افتتاحی اجلاس بلایا جائے گا اور ارکان کے حلف کے بعد اسپیکر اور ڈپٹی اسپیکر کا انتخاب آئین کے آرٹیکل 53 کی شق ایک کے تحت ہوگا۔

مزید پڑھیں؛ حکومت سازی کا عمل مکمل کرنے کیلئے 29 فروری تک کا وقت ہے

ذرائع ن لیگ کے مطابق اسپیکر کے منصب کے لیے ن لیگ میں مشاورت شروع ہوگئی ہے، سابق اسپیکر ایاز صادق ایک مرتبہ پھر اسپیکر کے عہدے کے مضبوط امیدوار ہیں جبکہ خواجہ آصف اور رانا تنویر حسین بھی اس دوڑ میں شامل ہیں، تاہم اس حوالے سے حتمی فیصلہ قائد ن لیگ نواز شریف کریں گے۔

ذرائع نے مزید بتایا کہ ڈپٹی اسپیکر کا عہدہ پیپلز پارٹی کو ملے گا، اسپیکر اور ڈپٹی اسپیکر کے انتخاب کے بعد قومی اسمبلی قاعدہ 4 کے تحت وزیراعظم کا انتخاب کرے گی، تاہم حکومت سازی سے متعلق تمام مراحل مارچ کے پہلے ہفتے میں مکمل کرلیے جائیں گے۔