پاکستان مسلم لیگ (ن) کی چیف آرگنائزر مریم نواز کے شوہر کیپٹن (ر) صفدر نے کہا ہے کہ سیاسی جماعتوں کے ساتھ ملکی استحکام کے لئے بیٹھنا پڑے گا۔

مسلم لیگ ن کے رہنما کیپٹن (ر) صفدر الیکشن کمیشن پہنچ گئے جہاں صحافی نے ان سے سوال کیا کہ الیکشن لڑے تھے یا لڑوایا گیا؟ جس پر انہوں نے کہا کہ الیکشن لڑا ہے اس لیے تو الیکشن کمیشن آئے ہیں۔

صحافی نے سوال کیا کہ این اے 15 کا رزلٹ چیلنج کردیا یا کریں گے؟ کیپٹن (ر) صفدر نے کہا کہ الیکشن کمیشن کو بتانے آئے ہیں کہ این اے 15 کا فارم 47 غلط ہے۔

صحافی نے کیپٹن (ر) صفدر سے سوال کیا کہ کس سیاسی جماعت سے ملکر حکومت بنائیں گے؟ جس پر انہوں نے کہا کہ سیاسی جماعتوں کے ساتھ ملکی استحکام کے لئے بیٹھنا پڑے گا۔

صحافی نے سوال کیا کہ کیا بانی پی ٹی آئی کے ساتھ بھی بیٹھ سکتے ہیں؟ کیپٹن ر صفدرنے جواب دیتے ہوئے کہا کہ جس نے نو مئی کو قومی اداروں پر حملہ کیا ہے اس کے ساتھ بیٹھنے سے بہتر ہے کہ سیاست چھوڑ دی جائے۔

انہوں نے کہا کہ اس شخص نے چینی صدر کی آمد پر کنٹنیر لگا لیا، اس شخص نے ملکی معیشت کا بیڑا غرق کردیا، وہ شخص غدار پاکستان ہے۔

صحافی کی جانب سے سوال کیا گیا کہ کیا آپ مانسہرہ حلقہ پندرہ کا الیکشن چیلنج کرنے آئے ہیں یا کردیا ہے، یا کریں گے؟ سوال کا جواب دیتے ہوئے انہوں نے بتایا کہ ابھی بتانے آیا ہوں کہ تورغر کے علاقے سے سواسو پولنگ اسٹیشنز کا نتیجہ نہیں آیا اور فارم 47 جاری کردیا گیا ہے، ہم فارم 47 کو چیلنج کرنے آئے ہیں، کالا ڈھاکہ و تورغر سے جو پریذائڈنگ آفیسر سامان لیکر آیا وہ بے ہوش ہے اسپتال میں ہے پتہ نہیں اس کے ساتھ کیا ہوا ہے۔