اسلام آباد: 8 فروری کو ہونے والے الیکشن میں کامیاب آزاد امیدواروں کو کسی بھی سیاسی جماعت میں شامل ہونے کا آج آخری روز ہے۔

عام انتخابات میں کامیاب ہونے والے قومی اسمبلی کے نومنتخب اراکین کا گزٹ نوٹیفکیشن جاری کرنے کے بعد الیکشن کمیشن نے آزاد امیدواروں کی سیاسی جماعت میں شمولیت کیلئے مرکزی سیکرٹریٹ میں سہولت ڈیسک قائم کردی ہے۔

الیکشن کمیشن کی جانب سے آزاد امیدواروں کو پارٹی سربراہ کا اصل بیان حلفی سہولت ڈیسک پر جمع کرانے کی ہدایت کی گئی ہے۔

آزاد امیدواروں کو آرٹیکل 106 کے تحت تین روز میں کسی بھی سیاسی جماعت میں شامل ہونا ہوتا ہے، نوٹیفکیشن کے بعد قومی اسمبلی کے نومنتخب ایم این ایز کو آج تک کسی بھی سیاسی جماعت میں لازمی شمولیت اختیار کرنی ہوگی، جن ارکان کا نوٹیفکیشن اتوار کو جاری ہوا ان کو کل تک کسی جماعت میں شمولیت کا اعلان کرنا ہوگا۔

پی ٹی آئی کو کے پی میں حکومت سازی کیلئے کسی بھی جماعت میں شمولیت کیلئے دو روز میں فیصلہ کرنا ہوگا، تاہم ارکان قومی اسمبلی کے پاس صرف 24 گھنٹے کا وقت ہے۔