پشاور: پاکستان پیپلز پارٹی کے رہنما اور این اے 30 کے امیدوار مصباح الدین نے کہا ہے کہ الیکشن 2024 میں ہمارے مقابلے کا کوئی نہیں ہے۔

مصباح الدین نے بول نیوز سے خصوصی گفتگو کرتے ہوئے کہا کہ پیپلز پارٹی برسر اقتدار آکر اپنے منشور پر عمل کریگی، نوجوانوں کو روزگار کارڈز، تین سو یونٹ فری بجلی، بے نظیر انکم سپورٹ پروگرام، کسان کارڈ اور دیگر مراعات عوام کو دینگے۔

انہوں نے کہا کہ پیپلز پارٹی کا دس نکات پر مشتمل عوامی منشور ہے، انتخابات میں ہمارے مقابلے کا کوئی نہیں۔

رہنما پی پی نے کہا کہ تحریک انصاف نے صوبے میں دس سال حکومت کی لیکن ایک بھی وعدہ پورا نہیں کیا، ایک ارب درخت لگانے اور ساڑھے تین سو ڈیمز بنانے کے وعدے کہاں گئے۔

انکا کہنا تھا کہ وزیر اعلیٰ ہاؤس اور گورنر ہاؤس کو یونیورسٹی بنانے کے وعدہ کا کیا ہوا، میرے حلقے میں بہت زیادہ مسائل ہیں، بجلی، گیس، سڑکیں اور بدامنی جیسے مسائل ہیں۔

مصباح الدین نے مزید کہا کہ ماضی میں کسی نے بھی حلقے میں کام نہیں کیا، کارکردگی کی بنیاد پر کامیابی حاصل کرونگا۔