جماعت اسلامی پاکستان کے ترجمان قیصر شریف نے کہا ہے کہ الیکشن میں دھاندلی کیخلاف جدوجہد پر کوئی سمجھوتہ نہیں ہوگا۔

ترجمان جماعت اسلامی قیصر شریف نے اپنے جاری کردہ بیان میں کہا کہ عام انتخابات میں دھاندلی کیخلاف الیکشن کمیشن میں دائر شکایات پر امیر جماعت اسلامی سراج الحق پریس کانفرنس کریں گے، سراج الحق آج ساڑھے تین بجے سہ پہر اسلام آباد میں اب تک کی صورت حال سے آگاہ کریں گے۔

انہوں نے کہا کہ صوبہ کے پی کے صوبائی اور قومی اسمبلی کے امیدواران کا اجلاس آج شام پشاور میں طلب کر لیا، جے آئی یوتھ کی مرکزی لیڈر شپ کا اجلاس کل ساڑھے دس بجے منصورہ میں طلب کیا گیا ہے۔

قیصر شریف نے کہا کہ دھاندلی کے خلاف تحریک کے حوالے سے مشاورت ہو گی ، ووٹ چوری کرکے نوجوانوں کو مزید مایوس کیا گیا، 65 فیصد آبادی کو ناامیدی کے اندھیروں سے نکالیں گے۔

انکا کہنا تھا کہ دھاندلی کے خلاف جدوجہد پر کوئی سمجھوتہ نہیں ہوگا، پولنگ اسٹیشنوں پر نہیں قوم کے مستقبل پر ڈاکا ڈالا گیا۔

ترجمان جماعت اسلامی نے مزید کہا کہ چوری شدہ مینڈیٹ سے جو حکومت بنے گی اس سے بہتری کی کوئی امید نہیں، مہنگائی، بے روزگاری اور کرپشن حکمرانوں کے قوم پر تحفے ہیں۔