پاکستان اور یورپی یونین نے متواتر مصروفیات اور بات چیت کے ذریعے پارلیمانی روابط مضبوط کرنے پر اتفاق کیا ہے۔

اس حوالے سے مفاہمت نگران وزیر خارجہ جلیل عباس جیلانی اور جنوبی ایشیا کے ممالک کے ساتھ تعلقات کے لیے یورپی پارلیمنٹ کے وفد کی سربراہ نکولا پروکاسینی کے درمیان ہونے والی ملاقات میں ہوئی۔

دوران ملاقات انہوں نے جغرافیائی سیاست کے ابھرتے ہوئے رجحانات پر بھی تبادلہ خیال کیا۔

اس سے قبل نگران وزیر خارجہ کی برسلز میں یورپی یونین کے کمشنر برائے موسمیاتی تبدیلی سے ملاقات ہوئی تھی جس میں پاکستان اور ای یو کے درمیان سبز اشتراک کو فروغ دینے پر تبادلہ خیال ہوا تھا۔

دوسری جانب وزیر خارجہ نے یورپی یونین کے خصوصی ایلچی برائے آزادی مذہب و عقائد فرانز وین ڈیل سے بھی ملاقات کی جس میں دنیا میں مذہبی عدم برداشت کے بڑھتے ہوئے رحجان اور بین المذاہب ہم آہنگی کے فروغ کے حوالے سے تبادلہ خیال کیا گیا۔

ملاقات کے دوران فریقین نے عدم برداشت کے رحجان میں کمی لانے اور پرامن مشترکہ مستقبل کے حصول کیلئے ایک دوسرے کے عقیدے کا احترام کرنے کی اہمیت پر زور دیا۔

اس کے علاوہ جلیل عباس جیلانی نے برسلز میں یورپین ایکسٹرنل ایکشن سروس کے سیکرٹری جنرل سٹیفانو سننینو سے بھی ملاقات کی جس میں پاکستان اور یورپین یونین کے تعلقات پر اطمینان کا اظہار کیا گیا۔

دوران ملاقات میں اسٹریٹجک انگیجمنٹ پلان (2019) کے تحت شعبوں میں تعلقات کو مضبوط بنانے اور تعاون کو مزید مضبوط کرنے پر بھی اتفاق کیا گیا۔