اسلام آباد: پاکستان پیپلز پارٹی کے سیکرٹری جنرل سید نیئر حسین بخاری نے کہا ہے کہ الیکشن کمیشن کی کارکردگی 8 فروری کے بعد نظر آئے گی۔

نیئر بخاری نے پریس کانفرنس سے خطاب کرتے ہوئے کہا کہ اسلام آباد کے تین حلقے میں سی ڈے اے سنیٹری ورکرز کی ڈیوٹیاں لگائی ہیں، گیارہ سو سی ڈی اے سینیٹری ورکرز کو ووٹ کے حق سے محروم کیا جارہا ہے، الیکشن کمیشن اس کا نوٹس لے سینیٹری ورکرز کو ووٹ کی سہولت دی جائے۔

انہوں نے کہا کہ ہمارے پوسٹرز اتارے جارہے ہیں الیکشن کمیشن کی پرفارمنس کے بارے میںابھی کچھ نہیں کہہ سکتے، الیکشن کمیشن کی پرفارمنس 8 فروری کے بعد نظر آئے گی، معلوم ہوگا الیکشن کمیشن کی کارکردگی کیسی رہی۔

پیپلز پارٹی کے سیکرٹری جنرل نے کہا کہ میثاق جمہوریت کی خلاف ورزی پہلے میاں نواز شریف نے کی، جس قسم کی دہشت گردی انہوں نے کی ہے الیکشن کمیشن کو اسکا نوٹس لینا چاہیے۔

انکا کہنا تھا ہے کہ جس دن رزلٹ شیٹ آئے گی میری پارٹی اسٹریٹجی پر غور کرے گی، پاکستان کے استحکام کا انحصار ان انتخابات پر ہے۔

نیئر بخاری نے کہا کہ پاکستان میں پولیٹیکل اسٹیبیلٹی آئے گی تو اکنامک اسٹیبیلٹی آئے گی، پیپلز پارٹی وہ جماعت ہے جس نے ہمیشہ ڈائلاگ کیا، میری پارٹی سیاسی وژن رکھتی ہے۔

انہوں نے مزید کہا کہ الیکشن کے بعد جو بھی اتحاد بنے گا بلاول بھٹو زرداری لیڈ کریں گے، اگلے وزیر اعظم بلاول بھٹو زرداری ہوں گے۔