آٹھ فروری کو ہونے والے عام انتخابات میں صرف تین روز باقی رہ گئے ہیں، جس کے پیش نظر سیاسی جماعتوں نے انتخابی سرگرمیاں تیز کردی ہیں۔

جماعت اسلامی پاکستان آج راولپنڈی و اسلام آباد میں بڑے جلسے کرے گی، تاہم جماعت اسلامی تاریخی لیاقت باغ میں ساڑھے تین بجے جلسہ عام کرے گی۔

لیاقت باغ میں جماعت اسلامی کے جلسے سے امیر جماعت اسلامی سراج الحق خطاب کریں گے جبکہ جماعت اسلامی کا دوسرا جلسہ فاطمہ جناح پارک کے سامنے بڑے گراؤنڈ میں چھ بجے ہوگا۔

اسلام آباد کے جماعت اسلامی کے جلسے سے امیر جماعت اسلامی سراج الحق خطاب کریں گے۔

دوسری جانب پاکستان پیپلز پارٹی خطہ پوٹھوہار میں آج تلہ گنگ میں میدان سجائے گی، تاہم سابق صدر آصف علی زرداری آج تلہ گنگ کے گورنمنٹ بوائز اسکول گراؤنڈ میں خطاب کریں گے۔

اس کے علاوہ آصفہ بھٹو آج رحیم یارخان کے علاقے نواز آبادمیں جلسے سے خطاب کریں گی، تاہم نوازآباد میں پیپلزپارٹی نے جلسہ گاہ کی تیاریاں مکمل کرلی ہیں، جلسہ گاہ میں 10 کنٹینر پر مشتمل 20 فٹ اونچا اور 80 فٹ چوڑا اسٹیج تیار کرلیا گیا ہے۔

جلسہ گاہ میں 30 ہزار کے قریب کرسیاں نصب اور قائدین کے پوسٹرز او ربینرز آویزاں کردیے گئے ہیں، تاہم آصفہ بھٹو دن 1 بجے جلسہ گاہ سے خطاب کریں گی۔