اسلام آباد: نگران وزیراعظم انوار الحق کاکڑ نے ملک کو مستحکم، خوشحال اور اقوام عالم میں ممتاز بنانے کے لئے مشترکہ کوششوں پر زور دیا ہے۔

نگران وزیراعظم انوار الحق نے وفاقی کابینہ کے اجلاس میں اپنے اختتامی کلمات میں کہا کہ پاکستان اور اس کے عوام میں آگے بڑھنے کی زبردست صلاحیت ہے۔

ملک کے بھرپور ثقافتی ورثے اور تہذیب کی طرف اشارہ کرتے ہوئے نگران وزیر اعظم نے کہا کہ اس کی ایک منفرد شناخت ہے۔

انوار الحق کاکڑ نے وطن سے گہری محبت اور پیار کا اظہار کرتے ہوئے کہا کہ خوش قسمت ہوں جسے ملک کی خدمت کا موقع ملا، مجھے اپنے ملک سے محبت ہے۔

اس موقع پر نگران وزیراعظم انوار الحق کاکڑ نے وزیر اعظم کے دفتر کے عملے کی طرف سے ملنے والے تعاون اور حوصلہ افزائی کی خصوصی تعریف کی اور ملٹری سیکرٹری، پرنسپل سیکرٹری اور کابینہ سیکرٹری کے تعاون کو بھی سراہا۔