لاہور: آئی جی پنجاب ڈاکٹر عثمان انور نے کہا ہے کہ انتخابی عمل میں گڑ بڑ کرنے والوں کے خلاف بلاتفریق سخت قانونی کارروائی ہوگی۔

الیکشن 2024ء کے پیش نظر آئی جی عثمان انور نے سیکیورٹی انتظامات سے متعلق اپنے جاری کردہ پیغام میں کہا کہ الیکشن کے پر امن انعقاد کیلئے الحمدللہ پنجاب پولیس تیار ہے، پاکستان کے تمام قومی ادارے پر امن اور شفاف انتخابات کو یقینی بنا رہے ہیں۔

انہوں نے کہا کہ انتخابی عمل میں گڑ بڑ کرنے والوں کے خلاف بلا تفریق سخت قانونی کارروائی ہوگی، قانون ہاتھ میں لینے یا انتخابی ضابطہ اخلاق کی خلاف ورزی کے مرتکب افراد سے آہنی ہاتھ سے نمٹیں گے۔

آئی جی پنجاب کا کہنا تھا کہ تمام لا انفورسمنٹ ایجنسیز، آرمڈ و سول آرمڈ فورسز مل کر الیکشن کمیشن کی قیادت میں الیکشن کروانے جا رہے ہیں، الیکشن کے دوران لڑائی جھگڑے کا خطرہ موجود رہتا ہے، انتخابی ضابطہ اخلاق کی خلاف ورزی کی قطعی اجازت نہیں۔

عثمان انور نے کہا کہ پنجاب پولیس نے این آر ٹی سی کے ساتھ مل کے انتہائی حساس اور حساس پولنگ سٹیشنز پر کیمرے نصب کر دیے ہیں، انتخابی میٹریل والی جگہوں پر سیکیورٹی فورس کے ساتھ ساتھ یہ سی سی ٹی وی کیمرے مانیٹرنگ کیلئے موجود ہیں۔

انہوں نے کہا کہ سیف سٹیز کی وائرلیس سسٹم کی متبادل جدید ٹیکنالوجی سے لیس لوکیشن اور مانیٹرنگ کی ایپ بھی تمام پولیس افسران کے پاس موجود ہے، جیسے ہم نے تھانوں کی انوائرمنٹ محفوظ اور خوبصورت بنائی، الیکشن کے لئے مکمل محفوظ ماحول فراہم کر رہے ہیں۔

آئی جی پنجاب نے مزید کہا کہ فیئر اینڈ فری الیکشن کے بعد ایک  منتخب جمہوری حکومت ملک کو آگے لے کر چلے گی، پنجاب پولیس دیگر قومی اداروں کے ساتھ مل کر الیکشن کے دوران امن و امان کی فضا کو ہر صورت برقرار رکھے گی۔

واضح رہے کہ ملک میں عام انتخابات 8 فروری 2024 کو شیڈول ہیں۔