امیر جماعت اسلامی سراج الحق نے کہا ہے کہ جماعت اسلامی اقتدار میں آکر آئی ایم ایف کو الوداع کہے گی۔

سراج الحق نے اپنے جاری کردہ بیان میں کہا کہ عوام کو اپنا حق چاہیے تو 8 فروری کو ترازو پر مہر لگانا ہو گی، الیکشن میں جماعت اسلامی کی جیت عوام کی جیت ہے۔

انہوں نے کہا کہ سیاسی آزادی کے لیے معاشی استحکام ضروری ہے، حکمرانوں نے کوئی ایسا ہسپتال نہیں بنایا جہاں ان کا علاج ہو۔

امیر جماعت اسلامی نے مزید کہا ہے کہ قرضوں کی یلغار نے ملک و قوم کی آزادی کو سلب کردیا، جماعت اسلامی اقتدار میں آکر آئی ایم ایف کو الوداع کہے گی، ہم دولت کی منصفانہ تقسیم یقینی بناکر سود کا خاتمہ کریں گے۔

اس سے قبل حافظ نعیم الرحمان نے اپنے ایک بیان میں کہا تھا کہ بلاول بھٹو خود لیاری سے الیکشن لڑنے کے قابل نہیں، کراچی میں آپ کا مینڈیٹ ہے تو الیکشن لڑنے سے کیوں ڈرتے ہیں۔

انہوں نے کہا کہ ہمیں ایک بھی ووٹ اور سیٹ جعلی اضافی نہیں چاہیے، کسی کو جعلی ایک ووٹ کا اضافہ بھی نہیں کرنے دیں گے، کوئی بھی جماعت کراچی کے مسائل حل کرنے کیلئے تیار نہیں، کراچی میں جماعت اسلامی سب سے بڑی جماعت بن کر سامنے آئے گی۔

انکا کہنا تھا کہ پیپلز پارٹی نے قبضہ کر کے میئر بنایا ہے، ہم نے بلدیاتی انتخاب سے بہت کچھ سیکھا ہے، نوجوان ملک کا قیمتی اثاثہ ہیں، ملک کے بچوں کے مستقبل کی فکر ہے، آج جلسے میں نوجوانوں کو لائحہ عمل دیں گے۔