اسلام آباد: عام انتخابات سے متعلق انتخابی عذرداریوں کے معاملے پر الیکشن کمیشن نے پانچوں ہائیکورٹس کو ٹربیونل ججز کی تعیناتی کیلئے مراسلہ لکھ دیا ہے۔

ذرائع کے مطابق الیکشن کمیشن آف پاکستان کی جانب سے ہائیکورٹس کے چیف جسٹس کو الگ الگ مراسلہ لکھا گیا۔

ذرائع الیکشن کمیشن کا کہنا ہے کہ عام انتخابات کی عذدرایوں کیلئے ٹربیونل تشکیل دینے ہیں، ٹربیونلز کی تشکیل کیلئے دستیاب ججز کے نام دیے جائیں۔

ذرائع نے مزید بتایا کہ ٹربیونل 4 ماہ کے اندر اندر عذر داریوں پر فیصلے کریں گے اور ٹربیونل میں کیس کے التواء کی کوشش کرنے والوں کو جرمانے کی ہدایات بھی جاری کی جائیں گی۔

دوسری جانب الیکشن کمیشن آف پاکستان نے قومی و صوبائی اسمبلیوں کے 37 حلقوں کے حتمی نتائج روک دیے۔

انتخابی عذرداریوں پر سماعت کے دوران الیکشن کمیشن نے قومی اسمبلی کے 15 حلقوں کے حتمی نتائج روک دیے جن میں این اے 58 چکوال، این اے 71 سیالکوٹ، این اے 51 راولپنڈی، این اے 117 لاہور، این اے 69 منڈی بہاوالدین کے نتائج شامل ہیں۔

اس کے علاوہ الیکشن کمیشن نے این اے 56 راولپنڈی، این اے 53 راولپنڈی، این اے 60 جہلم، این اے 69 منڈی بہاؤالدین، این اے 57 راولپنڈی، این اے 52 راولپنڈی اور این اے 126 لاہور، این اے 127 لاہور، این اے 87 خوشاب کے بھی حتمی نتائج جاری کرنے سے بھی  روک دیا۔

صوبائی اسمبلیوں کے 22 حلقوں میں پی پی 283 لیہ، پی پی 164 لاہوراور پی پی 46 سیالکوٹ، پی پی 22 چکوال، پی پی 49 سیالکوٹ، پی پی 14 راولپنڈی، پی بی 14 نصیرآباد، پی بی 44 کوئٹہ، پی پی 33 گجرات، پی پی 126 جھنگ، پی پی 128 جھنگ، پی پی 7 سرگودھا، پی پی 133 ننکانہ صاحب، پی پی 15 راولپنڈی کے حتمی نتائج روک دیے۔