اسلام آباد: آرمی چیف جنرل عاصم منیر نے کہا ہے کہ دہشت گردی کا مقابلہ اپنی پوری طاقت سے آخری دم تک کریں گے۔

وزیراعظم شہباز شریف سے آرمی چیف جنرل عاصم منیر نے وزیراعظم ہاؤس میں ملاقات کی جس میں ملک کی سیاسی اور سیکیورٹی صورتحال پر بات چیت کی گئی۔

ملاقات میں وزیراعظم اور آرمی چیف کے درمیان امن و امان اور ملکی سلامتی کے حوالے سے تبادلہ خیال ہوا اور چینی باشندوں کی سیکیورٹی کے حوالے سے بھی بات چیت ہوئی۔

دوران ملاقات آرمی چیف نے گفتگو کرتے ہوئے کہا کہ فوج نے پاکستان کے مخالفین کے مذموم عزائم کو ناکام بنایا ہے، قوم نے پچھلی دودہائیوں سے دہشت گردی کے خلاف جنگ لڑی، دشمنوں نے ایک بار پھر ریاست اور عوام کے حوصلے کو کم سمجھا۔

آرمی چیف جنرل عاصم منیر نے مزید کہا کہ یقینی بنائیں گے ہر غیر ملکی شہری پاکستان میں محفوظ رہے، آخری دم تک دہشت گردی کا مقابلہ اپنی پوری طاقت سے کریں گے۔

اس موقع پر آرمی چیف نے دہشت گردی کی لعنت کے خاتمے کے لیے مسلح افواج کے عزم کا اعادہ بھی کیا۔