اسلام آباد: قومی اسمبلی کی 33 نشستوں پر ضمنی انتخاب کے معاملے پر الیکشن کمیشن نے ضمنی انتخابات کے انعقاد تک متعلقہ اضلاع میں ٹرانسفر پوسٹنگ پر پابندی عائد کر دی۔

الیکشن کمیشن کی جانب سے ٹرانسفر پوسٹنگ پر پابندی کا نوٹیفکیشن جاری کر دیا گیا جس کے مطابق ضمنی انتخابات کے انعقاد تک تمام متعلقہ اضلاع میں ٹرانسفر پوسٹنگ پر مکمل طور پر پابندی ہو گی۔

نوٹیفکیشن میں بتایا گیا کہ ضمنی انتخاب تک کوئی سرکاری عہدیدار یا منتخب نمائندہ کسی ترقیاتی منصوبے کا اعلان نہیں کرے گا، 21 اپریل تک ٹرانفسر پوسٹنگ اور ترقیاتی اسکیموں کے اعلان پر پابندی ہو گی۔

اس سے قبل الیکشن کمیشن نے ضمنی انتخابات کے لئے سیاسی جماعتوں، امیدواروں اور پولنگ ایجنٹ کے لئے ضابطہ اخلاق جاری کیا تھا جس میں بتایا گیا تھا کہ الیکشن کے دوران نظریہ پاکستان کے منافی کوئی فعل نہیں کیا جائے گا اور ملکی آزادی سالمیت کے خلاف بھی کوئی بات نہیں کی جائے گی۔

الیکشن کمیشن کے جاری ضابطہ اخلاق کے مطابق عدلیہ اورمسلح افواج سمیت دیگراداروں کے خلاف کوئی بات نہیں کی جائے گی جبکہ انتخابی عمل کو بہتر انداز میں آگے بڑھانے کے لئے سیاسی جماعتیں پولنگ ایجنٹس کوہدایات جاری کریں گے، اگر کسی نے کوئی خلاف ورزی کی تو ان کے خلاف انتخابی ایکٹ کے تحت کارروائی ہوگی۔

ضابطہ اخلاق میں مزید کہا گیا کہ قانون نافذ کرنے والے اداروں کے ساتھ تعاون کیا جائے گا اور انتخابی اخراجات کے اکاؤنٹس بھی واضح کرنا ہوں گے، تمام ٹرانزیکشنز جی ایس ٹی رجسٹرڈ فارم کے تحت ہوں گی۔