ڈپٹی اسپیکر قومی اسمبلی سید غلام مصطفیٰ شاہ نے حلف اٹھا لیا، سید غلام مصطفیٰ شاہ 197 ووٹ لے کر قومی اسمبلی کے ڈپٹی اسپیکر منتخب ہوئے۔

اسپیکر کے انتخاب کے بعد سردار ایاز صادق کی زیرصدارت قومی اسمبلی کا اجلاس ہوا جس میں ڈپٹی اسپیکر کیلئے پیپلزپارٹی کے غلام مصطفی شاہ اور سنی اتحاد کونسل کے جنید اکبر کے درمیان مقابلہ ہوا۔

سید غلام مصطفیٰ شاہ 197 ووٹ لے کر قومی اسمبلی کے ڈپٹی اسپیکر منتخب ہوئے اور انہوں نے عہدے کا حلف بھی اٹھالیا، اسپیکرقومی اسمبلی ایازصادق نے ڈپٹی اسپیکر سیدغلام مصطفیٰ شاہ سےحلف لیا۔

ڈپٹی اسپیکر انتخاب کیلئے کل 290ووٹ کاسٹ کئے گئے،غلام مصطفی شاہ 197 ووٹ لے کر ڈپٹی سپیکر منتخب ہو گئے جبکہ ان کے مدمقابل جنید اکبر کو 92 ووٹ ملے جبکہ ایک ووٹ مسترد ہوا۔

اسپیکر قومی اسمبلی ایاز صادق نے سید غلام مصطفی شاہ کو مبارکباد دی اور ان سے عہدے کا حلف لیا،ڈپٹی سپیکر نے چیئر سنبھال لی۔

ڈپٹی اسپیکر قومی اسمبلی سیدغلام مصطفیٰ نے کہا کہ انتخابی عمل میں حصہ لینے والےتمام ممبران کا شکرگزارہوں، جمہوریت کے استحکام کےلیےسب کو کردار اداکرنا چاہیے۔

اس سے قبل مسلم لیگ (ن) کے سردار ایاز صادق اسپیکر قومی اسمبلی منتخب ہوئے۔

 مسلم لیگ (ن) کے ایاز صادق 199 ووٹ حاصل کرکے اسپیکر قومی اسمبلی منتخب ہوگئے ہیں جبکہ ان کے مدمقابل پی ٹی آئی کی حمایت یافتہ سنی اتحاد کونسل اوراتحادیوں کی طرف سے اسپیکر کے امید وار عامر ڈوگر نے 91 ووٹ حاصل کیے۔

ذرائع کے مطابق مولانا فضل الرحمان نے قومی اسمبلی اسپیکر، ڈپٹی اسپیکر ، وزیر اعظم اور صدر کے الیکشن کا حصہ نہ بننے کا اعلان کرتے ہوئے کہا کہ یہ اسمبلی نہیں کوئی اور چیز ہے، ہم ووٹ کا حق استعمال نہیں کریں گے بلکہ اپوزیشن میں بیٹھ کر عوام کی نمائندگی کریں گے، اسمبلی پانچ سال پورے کرتی نظر نہیں آتی۔

گزشتہ روز قومی اسمبلی کا افتتاحی اجلاس شدید نعرے بازی، شورشرابے اور ہنگامہ آرائی کے باعث  اسپیکر راجہ پرویز اشرف نے آج صبح 10 بجے تک ملتوی کردیا گیا تھا۔

قومی اسمبلی کے گزشتہ روز کے اجلاس کی صدارت اسپیکر راجہ پرویز اشرف نے کی اور نومنتخب ارکان سےحلف لیا ، جس کے بعد تمام ارکان نے رجسٹر پردستخط کیے۔