پاکستان نے اقوام متحدہ کی سیکیورٹی کونسل کے منتخب ممبر کی انتہائی اہم سیٹ کے لئے لابنگ شروع کردی۔

پاکستان کے اقوام متحدہ میں متحرک مستقل مندوب منیر اکرم نے گزشتہ دنوں یوم پاکستان کی تقریب میں باقاعدہ اعلان کیا تھاکہ پاکستان آٹھویں بار سیکیورٹی کونسل کا رکن منتخب ہونے کے لئے انتخاب لڑے گا۔

سفارتی ذرائع کے مطابق تقریب میں اقوام متحدہ کی جنرل اسمبلی کے صدر ڈینس فرانسس نے خصوصی شرکت کی تھی۔

جنرل اسمبلی کے صدر نےیوم پاکستان میں شرکت اور پاکستان کے اقوام متحدہ میں کردار کے کھل کی تعریف کی تھی۔

صدر جنرل اسمبلی نے افواج پاکستان کی اقوام متحدہ کے امن مشن میں قربانیوں کا تفصیلی احاطہ کیا تھا۔

سفارتی ذرائع کے مطابق صدر جنرل اسمبلی کی یوم پاکستان میں شرکت ایک پیغام بھی ہے، پاکستان سیکیورٹی کونسل کا ممبر منتخب ہو جائے گا ، سفارتی زرایع

عالمی امن کو درپیش حالیہ واقعات اور تنازعات کے پس منظر میں پاکستان کا سیکیورٹی کونسل میں ہونا پاکستان کی سفارت کاری کے لئے ایک چیلنج بھی ہوگا ، ایک سو ترانوے ممبران میں سے پاکستان کو منتخب ہونے کے لئے دو تہائی ایک سو اٹھائیس ممبران کا ووٹ حاصل کرنا ہو گا۔

پاکستان کو اس وقت جی 77 اور چین سمیت ایشیا پیسیفک اور سینٹرل ایشیا کے ممالک کی حمائت حاصل ہے۔

سفارتی ذرائع کے مطابق ہندوستان روائتی طور پر پردے کے پیچھے پاکستان کی سیکیورٹی کونسل الیکشن کی مخالفت کررہا ہے۔

اقوام متحدہ میں پاکستانی سفیر منیر اکرم کا کردار انتہائی اہم ہو گیا ، سفیر منیر اکرم کی دعوت پہ جنرل اسمبلی کے صدر اور بڑی تعداد میں دوست ممالک کی یوم پاکستان میں شرکت جیت کی راہ ہموار کرے گی ۔

حکومت پاکستان نے منتخب ہونے کے لئے سفیر منیر اکرم کو ہر ممکن کوشش کی ہدایات جاری کردیں۔

اقوام متحدہ میں پاکستان کے سفیر منیر اکرم پاکستان کی کامیابی کے لئے پرامید ہیں ،سیکیورٹی کونسل کے ممبر منتخب ہونے سے پاکستان اپنے اور عالمی تنازعات کے حل کے لئے ٹھوس موقف اختیار کرے گا ۔

منیر اکرم کو اقوام متحدہ میں عالمی مسائل بشمول حالیہ غزہ میں اسرائیلی جارحیت پہ اپنے زبردست موقف پہ مؤثر ترین سفارت کار سمجھا جاتا ہے۔

انتخاب کا مرحلہ دسمبر دو ہزار چوبیس کو مکمل ہو جائے گا۔