اسلام آباد: صدر مملکت آصف علی زرداری کو گارڈ آف آنر پیش کردیا گیا۔

گارڈ آف آنر پیش کرنے کی پروقار تقریب ایوان صدر میں منعقد ہوئی جس میں مسلح افواج کے دستے نے صدر مملکت آصف علی زرداری کو گارڈ آف آنر پیش کیا۔

اس موقع پر صدر مملکت آصف علی زرداری نے گارڈ آف آنر کا معائنہ کیا اور عملے سمیت دیگر شخصیات سے فرداً فرداً مصافحہ بھی کیا۔

گارڈ آف آنر پیش کرنے کی پروقار تقریب میں بلاول بھٹو، بختاور بھٹو اور آصفہ بھٹو زرداری بھی شریک تھے۔

گزشتہ روز آصف علی زرداری کی بطور صدر پاکستان حلف برداری کی تقریب ایوان صدر میں ہوئی تھی جس میں چیف جسٹس آف پاکستان قاضی فائز عیسیٰ نے آصف زرداری سے بطور صدر مملکت کے عہدے کا حلف لیا تھا۔

پاکستان میں عام انتخابات 2024 اور صدارتی انتخاب کے انعقاد کے بعد دوسری بار کامیاب ہونے والے نو منتخب صدر آصف علی زرداری نے آج 14ویں صدر مملکت کی حیثیت سے حلف اٹھایا تھا۔

مزید پڑھیں: آصف علی زرداری ملک کے 14 ویں صدر منتخب

اس سے قبل نئے صدر مملکت کے لیے انتخاب ہوا تھا جس کے لیے قومی اسمبلی اور چاروں صوبائی اسمبلی میں ووٹنگ ہوئی تھی۔

ملک میں ہونے والے صدارتی انتخابات میں حکومتی اتحاد کے امیدوار سابق صدر آصف علی زرداری نے سنی اتحاد کونسل کے امیدوار محمود خان اچکزئی کو بھاری اکثریت سے شکست دی تھی۔

حکومتی اتحاد کے امیدوار آصف علی زرداری نے 255 ووٹ جبکہ محمود خان اچکزئی نے 119 ووٹ حاصل کیے تھے۔

واضح رہے کہ آصف علی زرداری دوسری بار صدر مملکت کے عہدے پر فائز ہوئے ہیں۔ اس سے قبل وہ 2008 سے 2013 تک بھی صدر پاکستان رہ چکے ہیں۔