وفاقی وزیر اطلاعات و نشریات عطاء اللہ تارڑ سے پاکستان میں تعینات عوامی جمہوریہ چین کے سفیر جیانگ ژئی ڈونگ کی ملاقات ہوئی جس میں سی پیک، پاک چین اسٹریٹجک تعلقات، میڈیا اور فلم کے شعبے میں جاری تعاون اور چین پاکستان انفارمیشن کوریڈور سے متعلق تبادلہ خیال کیا گیا۔

ملاقات میں چینی سفیر نے عطاء اللہ تارڑ کو وزارت اطلاعات کا قلمدان سنبھالنے پر مبارکباد پیش کی اور دونوں ممالک کے درمیان میڈیا کے شعبوں میں تعاون کو وسعت دینے اور سی پیک کے بارے میں جعلی خبروں کی روک تھام کے لئے پاک چین انفارمیشن کوریڈور کے قیام کے حوالے سے بھی گفتگو ہوئی۔

وفاقی وزیر اطلاعات نے سی پیک کے حوالے سے جعلی خبروں کے انسداد کے لئے حکومت سے حکومت اور میڈیا سے میڈیا کی سطح پر میکنزم وضع کرنے کی ضرورت پر زور دیا اور کہا کہ پاکستان چین کے ساتھ اپنے تعلقات کو قدر کی نگاہ سے دیکھتا ہے، دونوں ممالک دوستی کے لازوال رشتے میں بندھے ہوئے ہیں۔

انہوں نے کہا کہ 1998ءمیں میرے دادا رفیق تارڑ نے بطور صدر چین کے وزیراعظم کے دورہ پاکستان پر ان کا استقبال کیا، پاک چین دوستی ہم نے نسل در نسل دیکھی ہے، ہمیں اپنی نئی نسل کو اپنی تاریخی اور مضبوط دوستی کے بارے میں آگاہ کرنا ہوگا، ہمیں نئی نسل کو بتانا ہوگا کہ کس طرح چین اور پاکستان نے مشکل وقت میں ایک دوسرے کا ساتھ دیا۔

عطاء اللہ تارڑ نے کہا کہ چین نے شنگھائی تعاون تنظیم اور اقوام متحدہ سمیت ہر عالمی فورم پر پاکستان کی حمایت کی، دونوں ممالک کے درمیان سی پیک کی صورت میں قریبی اور پائیدار شراکت داری خطے کے وسیع تر مفاد میں ہے، سی پک پاکستان کی معاشی ترقی کو فروغ دینے کے لئے ایک اہم سنگ میل کی حیثیت رکھتا ہے۔

انکا کہنا تھا کہ چین پاکستان اقتصادی راہداری علاقائی رابطوں کا ایک ایسا فریم ورک ہے جس سے نہ صرف چین اور پاکستان کو فائدہ ہوگا بلکہ ایران، افغانستان، ہندوستان، وسطی ایشیائی جمہوریہ اور خطے پر اس کے مثبت اثرات مرتب ہوں گے۔

وفاقی وزیر نے کہا کہ چین پاکستان انفارمیشن کوریڈور سی پیک کے بارے میں جعلی خبروں کی روک تھام کی جانب ایک اہم اسٹریٹجک اقدام ہوگا، اس کا مقصد ڈیجیٹل کنیکٹیویٹی اور معلومات کے تبادلے کی طاقت کو بروئے کار لانا ہے، وزارت اطلاعات اس حوالے سے اپنا کام جاری رکھے گی، وزیراعظم شہباز شریف کا وژن ہے کہ پاکستان کو سرمایہ کار دوست ملک بنانا ہوگا۔

ملاقات میں دونوں ممالک کے درمیان فلم اور ثقافت کے شعبہ میں تعاون کو وسعت دینے پر بھی اتفاق ہوا اور پاکستان اور چین کے درمیان ایس ڈی جیز کے ایجنڈے کو آگے بڑھانے کے حوالے سے بھی تبادلہ خیال ہوا۔

اس کے علاوہ ملاقات میں پاکستان کی سرکاری نیوز ایجنسی ایسوسی ایٹڈ پریس آف پاکستان اور چین کے چائنا میڈیا گروپ (سی ایم جی) کے درمیان تیسرے بیلٹ اینڈ روڈ فورم کے لئے ایم او یو کے حوالے سے بھی گفتگو ہوئی۔

ملاقات میں سی جی ٹی این اور پی ٹی وی کے درمیان سفری دستاویز کی مشترکہ پروڈکشن کے لئے تعاون پر بھی گفتگو ہوئی۔

عطاء تارڑ نے کہا کہ چین کی طرح پاکستان بھی ایک قدیم تہذیب ہے جس کی تاریخ سات ہزار سال پرانی ہے، پاکستان کی وادی سندھ سے بہت سی روحانی اور ثقافتی تحریکیں ابھریں جنہوں نے ایشیائی ثقافت کی شکل اختیار کی۔

انہوں نے کہا کہ پاکستان کی قدیم گندھارا تہذیب نے بدھ مت کو چین سمیت مشرقی ایشیا کے بڑے حصے میں متعارف کرایا، پاکستان اور چین نے گزشتہ سال پیلس میوزیم میں گندھارا بدھسٹ نمائش کا مشترکہ طور پر اہتمام بھی کیا۔

وفاقی وزیر نے مزید کہا کہ رومینہ خورشید عالم ایس ڈی جیز پروجیکٹ کے حوالے سے چین کے ساتھ قریبی رابطہ رکھے ہوئے ہیں، دونوں ممالک کی حکومتوں کے درمیان فلم پروڈکشن کا معاہدہ بھی زیر عمل ہے اور اے پی پی اور شنہوا نیوز ایجنسی کے درمیان مفاہمت کی یادداشت پر کام جاری ہے۔