کراچی: ڈی آئی جی ایسٹ زون غلام اظفر مہیسر نے کہا ہے کہ خودکش حملہ آور کا سر اور کچھ اعضا ملے ہیں

کراچی کے علاقے لانڈھی مانسہرہ کالونی میں ہونے والے خود کش دھماکے سے متعلق ڈی آئی جی ایسٹ زون نے میڈیا سے گفتگو کرتے ہوئے کہا کہ ابتدائی طور پر لگتا ہے دہشت گردوں کی تعداد دو تھی اور دونوں پیدل تھے۔

غلام اظفر مہیسر نے کہا کہ ایک دہشت گرد نے گاڑی کے قریب آکر خود کو دھماکے سے اڑا لیا اور دوسرے دہشت گرد نے گاڑی پر فائرنگ کی، غیرملکیوں کے ہمراہ موجود سیکیورٹی گارڈ نے دہشت گرد سے مقابلہ کیا۔

انکا کہنا تھا کہ پیٹرول پمپ کے قریب پولیس موبائل کھڑی تھی جو دھماکےکی آواز سن کر پہنچی، شرافی گوٹھ تھانے کے اہلکاروں نے بھی دہشت گرد سے مقابلہ کیا، دہشت گرد کو ہیڈ شارٹ کر کے ہلاک کیا۔

ڈی آئی جی ایسٹ زون نے کہا کہ حملہ صبح 6 بجکر 50 منٹ پر کیا گیا، خودکش حملہ آور کا سر اور کچھ اعضا ملے ہیں، فائرنگ سے ہلاک دوسرے دہشت گرد کے فنگر پرنٹس کے ذریعے شناخت کی کوشش کی جائےگی۔

انہوں نے مزید کہا کہ غیرملکیوں سے متعلق تھریٹ موجود تھے، سیکیورٹی تھریٹ کے باعث پولیس بھی الرٹ تھی، سیکیورٹی کے حوالے سے سی پیک اور نان سی پیک کا پلان تیار کیا گیا تھا، یہ طے ہوا تھا کہ غیر ملکی پولیس، رینجرز یا پرائیویٹ سیکیورٹی ساتھ رکھیں گے، یہی وجہ ہے کہ غیر ملکیوں کے ساتھ مسلح گارڈز تھے جنہوں نے مقابلہ بھی کیا۔

واضح رہے کہ کراچی کے علاقے لانڈھی مانسہرہ کالونی میں پولیس نے غیر ملکیوں پر حملے کی کوشش ناکام بناتے ہوئے دو دہشت گردوں کو ہلاک کردیا جبکہ سیکیورٹی گارڈ سمیت تین افراد زخمی بھی ہوگئے۔