کراچی: پاکستان رینجرز سندھ کی جانب سے رمضان المبارک کے آخری عشرے اور عید الفطر کے موقع پر شہر اور صوبے بھر میں امن و امان کے قیام کو یقینی بنانے کے لیے سیکیورٹی کے سخت انتظامات مکمل کر لیے گئے ہیں۔

ترجمان سندھ رینجرز کے مطابق آخری عشرے کے دوران مساجد، امام بارگاہوں اور جماعت خانوں کی سخت نگرانی کے لیے رینجرز کے جوان تعینات رہیں گے۔

ترجمان کا کہنا ہے کہ آخری عشرے اور عید الفطر کی تیاریوں کے موقع پر عوام کے تحفظ کو یقینی بنانے کے لیے کمرشل ایریاز اور تفریحی مقامات میں اسنیپ چیکنگ، موبائل پیٹرولنگ اور موٹر سائیکل گشت کو مزید بڑھا دیاگیا ہے۔

ترجمان سندھ رینجرز نے مزید کہا کہ عوام سے اپیل ہے کہ وہ دہشت گردی کی روک تھام کے لیے قانون نافذ کرنے والے اداروں کا ساتھ دیں۔