عظمیٰ بخاری کا کہنا ہےکہ پاکستان میں تحریک انصاف نامی ایک جماعت تھی جو اب ختم ہو چکی ہے۔

 وزیر اطلاعات پنجاب عظمیٰ بخاری نے وزیراعلیٰ کے پی علی امین گنڈاپور اور بیرسٹر سیف کے بیان پر ردعمل دیتے ہوئے کہاکہ خیبر پختونخواہ میں سینٹ انتخاب الیکشن کمیشن کی وجہ سے نہیں، بلکہ آپ لوگوں کی ہٹ دھرمی کی وجہ سے نہیں ہوا، الیکشن کمیشن نے ملک بھر میں ایک ہی دن سینیٹ الیکشن کروانے کی تیاریاں کی تھیں۔

انہوں نے کہاکہ پشاور ہائیکورٹ نے اسپیکر کے پی اسمبلی کو مخصوص نشستوں پر آنے والے ارکان سے حلف لینے کا حکم دیا، لیکن اسپیکر کے پی اسمبلی قاسم سوری پارٹ ٹو بن گئے۔

 عظمیٰ بخاری نے کہاکہ علی امین گنڈا پور نے پہلے رمضان پیکج پر خود اپنی تصویریں شائع کروائی اب خود ہی اس پر برہمی کا اظہار کر رہے ہیں، ڈرامے بازیاں اور رنگ بازیاں اس جماعت پر ختم ہیں، معلوم بھی نہیں خیبر پختونخواہ میں کسی کو رمضان پیکج ملا ہے یا نہیں لیکن سوشل میڈیا پر اس کا منجن ضرور بیچا گیا۔

وزیر اطلاعات پنجاب عظمیٰ بخاری کا کہنا تھاکہ پاکستان میں تحریک انصاف نامی ایک جماعت تھی جو اب ختم ہو چکی ہے، جو جماعت الیکشن کمیشن میں رجسٹرڈ نہیں جس کا چیئرمین اور انتخابی نشان نہیں اس کو مخصوص نشست مل ہی نہیں سکتی۔