وفاقی وزیر صنعت و پیداوار رانا تنویر حسین نے ملک میں سرمایہ کاری کے فروغ اور معاشی ترقی کے لیے تاجر برادری کو سہولت فراہم کرنے کے حکومتی عزم کا اظہار کیا ہے۔

پاکستان انڈسٹریل اینڈ ٹریڈرز ایسوسی ایشنز فرنٹ کے وفد کی گزشتہ شب وفاقی وزیر صنعت و پیداوار رانا تنویر حسین سے ملاقات ہوئی۔

دوران ملاقات وفاقی وزیر رانا تنویر نے گفتگو کرتے ہوئے کہا کہ نجی شعبے کا ملک کی معاشی ترقی اور خوشحالی کے لئے کلیدی کردار ہے، حکومت معاشی چیلنجز پر قابو پانے کے لیے پر امید ہے، نجی شعبے کی ترقی اور سہولت پر یقین رکھتے ہیں۔

انہوں نے کہا کہ معیشت حکومت کی اولین ترجیح ہے، معیشت کی بحالی کے لیے تمام ضروری اقدامات اٹھائے جا رہے ہیں، عوام کو ریلیف دینا ہمارا اولین فرض ہے۔

رانا تنویر نے کہا کہ پرائیویٹ سیکٹر ملک میں معاشی ترقی کو آگے بڑھانے میں اہم کردار ادا کر سکتا ہے، حکومت نجی شعبے کو مکمل تعاون فراہم کرے گی۔

وفاقی وزیر نے مزید کہا کہ ہم ٹیکس بڑھانے کے بجائے معاشی ترقی پر توجہ دے رہے ہیں، حکومت کے لیے گڈ گورننس مرکزی حیثیت رکھتی ہے، نجی شعبے کی جانب سے معاشی نمو کے حوالے سے کسی بھی عملی تجاویز کا خیرمقدم کیا جائے گا۔