اسلام آباد: وزیراعظم شہباز شریف نے کہا ہے کہ پاکستان فلسطینی عوام کے لیے ہر عالمی فورم پر آواز بلند کرتا رہے گا۔

 فلسطین کے سفیر احمد جواد کی وزیراعظم محمد شہباز شریف سے ملاقات ہوئی جس میں وزیر اعظم نے فلسطین کے صدر ڈاکٹر محمود عباس کے تہنیتی پیغام پر شکریہ ادا کیا۔

وزیراعظم نے غزہ میں جاری اسرائیلی بربریت کی شدید مذمت کرتے ہوئے کہا کہ پاکستان کا فلسطین کی برادر ریاست کے ساتھ تاریخی اور قریبی رشتہ ہے، پاکستان نے اقوام متحدہ، او آئی سی اور دیگر بین الاقوامی فورمز پر مسئلہ فلسطین کی مسلسل حمایت کی ہے۔

دوران ملاقات وزیر اعظم نے فلسطینی عوام کے خلاف چھیڑی جانے والی نسل کشی کی جنگ کو فوری بند کرنے کا مطالبہ دہرایا اور اسرائیلی فورسز کی وحشیانہ کارروائیوں سے 32 ہزار سے زائد فلسطینیوں کی المناک موت پر گہرے دکھ کا اظہار کیا۔

ملاقات میں وزیراعظم نے جنوبی افریقہ کی جانب سے دائر کیس میں عالمی عدالت انصاف کے عبوری فیصلے پر بھی بات کی اور اقوام متحدہ کی سلامتی کونسل کی قرارداد 2728 کی منظوری کا خیرمقدم بھی کیا۔

انہوں نے کہا کہ پاکستان نے بھی آئی سی جے میں فلسطین کی حمایت کی تھی، اسرائیل نے قرارداد کو نظر انداز کیا اور ڈھٹائی سے اس کی خلاف ورزی جاری رکھی۔

وزیراعظم نے فلسطینی سفیر کو مکمل تعاون اور یکجہتی کی یقین دہانی کرائی اور کہا کہ پاکستان فلسطینی عوام کے ساتھ اظہار یکجہتی کے لیے ہر عالمی فورم پر آواز بلند کرتا رہے گا، پاکستان اب تک غزہ کے عوام کے لیے امدادی سامان کی سات اقساط بھیج چکا ہے، امداد کی ایک قسط عید کے فوراً بعد بھجوانے کا بھی منصوبہ ہے۔

دوسری جانب فلسطینی سفیر نے فلسطینی عوام کی حمایت پر وزیراعظم اور پاکستانی عوام کا شکریہ ادا کیا۔

واضح رہے کہ ملاقات میں وزیر خارجہ سینیٹر محمد اسحاق ڈار، معاون خصوصی طارق فاطمی اور سیکریٹری خارجہ بھی شریک تھے۔