کرغزستان میں پاکستانی طلبہ کے خلاف پرتشدد واقعات کے بعد نائب وزیراعظم اور وزیر خارجہ اسحاق ڈار وزیراعظم شہباز شریف کی ہدایات پر کرغزستان کے دارالحکومت بشکیک روانہ ہوگئے۔

وزیر اعظم شہباز شریف نے نائب وزیر اعظم اور وزیر خارجہ اسحاق ڈار کو کرغزستان بھیجنے کا فیصلہ کیا ہے، تاہم وزیر خارجہ کے ہمراہ، وفاقی وزیر برائے کشمیر امور امیر مقام بھی کرغیزستان روانہ ہوگئے۔

دونوں وزراء علی الصبح خصوصی طیارے کے ذریعے بشکیک روانہ ہوئے، دورے کے دوران نائب وزیراعظم اسحاق ڈار بشکیک میں اعلیٰ سرکاری حکام سے ملاقاتیں کریں گے اور زخمی طلباء کو طبی سہولیات کی فراہمی کو یقینی بنائیں گے۔

اس کے علاوہ وزیر خارجہ اسحاق ڈار پاکستانی طلباء کی وطن واپسی کے حوالے سے بھی معاملات کا جائزہ لیں گے۔

یاد رہے کہ وزیراعظم کل پورا دن صورتحال کا جائزہ لیتے رہے اور بشکیک میں پاکستانی سفیر سے بھی رابطے میں رہے، صورتحال تسلی بخش ہونے کے باوجود پاکستانی طلباء کو ضروری تعاون اور سہولت کی فراہمی کے لیے یہ وفد بھیجنے کا فیصلہ کیا گیا۔

کرغزستان میں جمعے کی رات غیر ملکی طلبہ پر مشتعل ہجوم کے تشدد کے بعد پاکستانی سفیر حسن ضغیم نے بتایا کہ پاکستانی برادری کو ہرممکن سہولت فراہم کی جا رہی ہے۔

طلبہ پر پرتشدد واقعات میں پانچ پاکستانی طلبہ کے زخمی ہونے پر دفتر خارجہ نے اسلام آباد میں تعینات کرغز سفارت خانے کے ناظم الامور میلس مولدالیف کو ہفتے کو طلب کرکے واقعے پر شدید احتجاج کیا۔