اسلام آباد: عالمی مالیاتی فنڈ (آئی ایم ایف) نے غربت کے خاتمے کے پروگرامز میں توسیع کا مطالبہ کردیا۔

ذرائع کے مطابق پاکستان اور آئی ایم ایف جائزہ مشن کے درمیان نئے بیل آوٹ پیکیج کیلئے آج چوتھے روز بھی مذاکرات ہوئے جس میں آئی ایم ایف نے غربت کے خاتمے اور سماجی تحفظ کے پروگرامز کو مزید توسیع دینے کا مطالبہ کیا۔

ذرائع نے بتایا کہ آئی ایم ایف نے بینظیر انکم سپورٹ پروگرام (بی آئی ایس پی) کی کوریج میں اضافے اور شفافیت یقینی بنانے اور انتظامی استعداد کار میں بہتری لانے پر زور دیتے ہوئے کہا کہ جتنا ممکن ہو کیش ٹرانسفر پروگراموں کے بجٹ میں اضافہ کیا جائے۔

حکام نے آئی ایم ایف کو بریفنگ میں بتایا کہ اس سال بی آئی ایس پی پر 472 ارب روپے خرچ کیے جائیں گے اور صوبوں کو بھی سماجی تحفظ کا بوجھ اٹھانے کیلئے قائل کیا جائے گا۔

 آئی ایم ایف کو بتایا گیا کہ بی آئی ایس پی مستحقین کو مستقبل میں بجلی ٹیرف پر کیش ٹرانسفر پروگرام کے ذریعے تحفظ دینے کا پلان ہے جبکہ ستمبر 2024 تک دو کروڑ گھرانوں کو مکمل طور پر فعال متحرک رجسٹری میں شامل کرنے کا بھی ہدف ہے۔

حکام نے بریفنگ میں مزید بتایا کہ بی آئی ایس پی سے مستفید ہونے والوں کی تعداد 93 لاکھ تک پہنچ گئی، اس سال کفالت پروگرام میں مزید تین لاکھ خاندانوں کو شامل کیا گیا، ہیلتھ کیش ٹرنسفر پروگرام میں 9 لاکھ خاندانوں کو رجسٹرڈ کیا گیا، ایجوکیشن کیش ٹرانسفر پروگرام میں 19 لاکھ بچوں کی انرولمنٹ کی گئی جبکہ اگلے مالی سال سماجی تحفظ کے پروگرامز کیلئے مزید فنڈز مختص کیے جائیں گے۔

ذرائع نے مزید بتایا کہ آئی ایم ایف نے مطالبہ کیا ہے کہ بی آئی ایس پی کی انتظامی استعداد کار میں بھی بہتری لائی جائے۔