لاہور: وزیر اعلیٰ پنجاب مریم نواز شریف سے جمہوریہ کوریا کے سفیر پارک کیجن کی ملاقات ہوئی جس میں دوطرفہ تعاون کے فروغ پر تبادلہ خیال کیا گیا۔

ملاقات میں وزیر اعلیٰ مریم نواز اور کورین سفیر کے درمیان باہمی اشتراک کار پر بھی اتفاق ہوا اور دوطرفہ تعاون کے فروغ کی ضرورت پر بھی زور دیا گیا۔

وزیر اعلیٰ مریم نواز نے ملاقات میں گفتگو کرتے ہوئے کہا کہ صنعتی ترقی کے لیے کوریا کی ٹیکنالوجی سے مستفید ہونا چاہتے ہیں، الیکٹرانکس، آٹوموبیل اور انفارمیشن ٹیکنالوجی میں کوریا کے اشتراک کار کا خیر مقدم کریں گے۔

انہوں نے کہا کہ پنجاب میں زراعت اور مائننگ انڈسٹری میں سرمایہ کاری کا وسیع پوٹینشل موجود ہے، کوریا کے ساتھ دو طرفہ تجارتی حجم میں مزید اضافہ ہونا چاہیے، جنوبی کوریا کو پنجاب میں آٹوموبیل سیکٹر میں سرمایہ کاری کیلئے معاونت کریں گے۔

مریم نواز نے مزید کہا کہ ویون کاٹن اور کاٹن یارن  ٹیکسٹائل سیکٹر میں کوریا کو برآمدات کے مواقع موجود ہیں، جدید زراعت، پیداواری صلاحیت  بڑھانے میں کوریا سے تعاون کے فروغ  کی ضرورت ہے۔

ملاقات کے دوران کورین سفیر نے وزیر اعلیٰ مریم نواز کو عہدہ سنبھالنے پر مبارک باد پیش کی۔