محکمہ موسمیات نے ملک میں رواں سال مون سون کی بارشیں زیادہ ہونے کی پیشگوئی کردی۔

محکمہ موسمیات کے مطابق مئی کے مہینے میں بارشوں کا نیا سلسلہ جاری ہونے کے امکانات ہیں، ملک بھر میں ہلکی جبکہ شمالی پنجاب میں بارشوں کا درمیانی سلسلہ جاری رہنے کا امکان ہے۔

ترجمان پی ڈی ایم اے نے بتایا کہ پنجاب کے پوٹھوہار علاقوں میں کسانوں کو گندم کےلئے حفاظتی اقدامات کرنے ہوں گے، طوفان اور ژالہ باری سے پوٹھوہار کے علاقے میں فصلوں اور عمارتوں کو نقصان پہنچ سکتا ہے جبکہ پہاڑی علاقوں میں لینڈ سلائیڈنگ کے بھی امکانات ہیں۔

محکمہ موسمیات کے مطابق مئی کے مہینے میں گرمی کی شدت میں اضافہ بھی ہوگا جبکہ ملک کے جنوبی حصوں میں فضا ہیٹ ویو کا باعث بن سکتی ہے، میدانی علاقے خاص طور پر ہیٹ ویو کی زد میں آنے کے امکانات ہیں، تاہم بڑے شہروں میں خاص طور پر ہیٹ ویو کے اثرات زیادہ ہوں گے۔

ڈی جی پی ڈی ایم اے عرفان علی کاٹھیا نے موسمی صورتحال پر انتظامیہ کو الرٹ رہنے کی ہدایت کی اور کہا کہ پنجاب بھر میں انتظامیہ کو موسمی صورتحال سے آگاہ کردیا ہے، اداروں کے درمیان مضبوط کمیونیکیشن کو ہر صورت ممکن بنایا جائے، شہریوں کو بھی موسمی تبدیلیوں اور احتیاطی تدابیر سے آگاہی دی جائے۔