اسلام آباد: حکومت نے ملک کو معاشی ترقی کی جانب گامزن کرنے کا عزم کا اظہار کیا ہے، تاہم پاکستان اور چین کی جانب سے سی پیک پر کام کی رفتار تیز کرنے پر غور کیا جارہا ہے۔

ذرائع کے مطابق 13 ویں جوائنٹ کوآپریشن کمیٹی کا اجلاس کل سے شروع ہوگا جبکہ یہ اجلاس ورچوئلی ہوگا اور پاکستانی وفد کی قیادت وزیر منصوبہ بندی احسن اقبال کریں گے جبکہ چینی وفد کی قیادت این ڈی آر سی کے چیئرمین کریں گے۔

ذرائع نے بتایا ہے کہ جے سی سی کی صدارت وزیر منصوبہ بندی اور چیئرمین این ڈی آر سی مشترکہ طور پر کریں گے، جس میں سی پیک کے دوسرے مرحلے کے اہم منصوبوں پر گفتگو ہوگی۔

ذرائع کا کہنا ہے کہ جے سی سی میں مواصلات، سیکیورٹی، انفراسٹرکچر کے منصوبوں پر گفتگو ہوگی جبکہ سی پیک کے تحت توانائی و اقتصادی ترقی اور زراعت کے منصوبوں پر بھی بات چیت کی جائے گی۔

اس کے علاوہ اجلاس میں پاکستان میں کام کرنے والے چینی انجینئرز و افراد کی سیکیورٹی پر بھی بات ہوگی اور چینی افراد کی سیکیورٹی کے حوالے سے کیے گئے اقدامات پر بریفنگ دی جائے گی۔

ذرائع کے مطابق معدنیات کاریڈور کا معاہدہ اس جے سی سی میں طے ہونے کا امکان ہے جبکہ جے سی سی ایم ایل ون کی بروقت شروعات کے لیے باقاعدہ ٹائم لائن کا تعین کیا جائے گا۔

ذرائع نے مزید بتایا کہ معدنیات کے ذیلی ورکنگ گروپس کی جلد از جلد چینی حکام سے میٹنگ کروائی جائے گی اور اسی میں معدنیاتی راہداری کے منصوبوں کو زیر بحث بھی لایا جائے گا۔