راولپنڈی: پاکستان تحریک انصاف کے رہنما علی محمد خان نے کہا ہے کہ بانی پی ٹی آئی کے خلاف مزید کیسز تیار کیے جارہے ہیں۔

پی ٹی آئی کے رہنما علی محمد خان نے اڈیالہ جیل کے باہر میڈیا سے گفتگو کرتے ہوئے کہا کہ بانی پی ٹی آئی نے کل سپریم کورٹ میں اپنا موقف پیش کی، انہوں نے سپریم کورٹ سے وکلاء کے ساتھ مشاورت کی اجازت مانگی ہے۔

انہوں نے کہا کہ نیب ترمیم کیس کی براہ راست نشریات پر ہمارا موقف ہے اسے براہ راست دکھایا جائے، بانی پی ٹی آئی کے خلاف اور کیسز تیار کیے جارہے ہیں، حکومت کو کہنا چاہتے ہیں پہلے کیسز بھی جعلی تھے ایف آئی کے نئے کیس میں کچھ نہیں۔

علی محمد خان نے کہا کہ رؤف حسن نے کل واضع کیا بانی پی ٹی آئی کو اس ویڈیو سے متعلق کوئی علم نہیں، بانی پی ٹی آئی نے ہمشہ یہ کہا ہے فوج بھی میری ہے ملک بھی میرا ہے، حکومت کو ہم حکومت نہیں مانتے، بانی پی ٹی آئی کا موقف ہے سیاست میں اسٹیبلشمنٹ کا کوئی رول نہیں ہونا چاہیے۔

انکا کہنا تھا کہ بانی پی ٹی آئی کے دور میں کوئی ڈرون حملہ نہیں ہوا، انہوں نے ہمیشہ ملک کا وقار مد نظر رکھا۔ ہمارے وکلاء پر دہشت گردی کے مقدمات درج کیے گئے ہیں۔

تحریک انصاف کے رہنما نے مزید کہا کہ بانی پی ٹی آئی کے ایکس ہینڈل سے متنازعہ ٹوئٹ پر آج پارٹی کا کور کمیٹی کا اجلاس بلایا گیا ہے، کور کمیٹی بانی پی ٹی آئی کے اکاؤنٹ سے ٹوئٹ ہونے والی ویڈیو کا جائزہ لے گی، آج کور کمیٹی فیصلہ کرے گی بانی پی ٹی آئی کے اکاؤنٹ سے شیئر ہونے والا مواد کو طرح کنٹرول ہوگا۔